İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 177 Hüküm no: 121 Orijinal metin no: [12b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Akşemseddin mahallesinden Habib b. Osman ile Ayşe bt. Yusuf’un boşanma davası Hul‘. Mahmiye-i İstanbul’da Akşemseddin mahallesinde sâkine Âişe bt. Yusuf nâm hatun meclis-i şer‘de işbu bâ‘isü’l-kitâb zevci Habib b. Osman mahzarında ikrâr ve takrîr-i kelâm edip mezbûr Habib zimmetinde mütekarrir ve ma‘kūdün-aleyh olan bin iki yüz akçe mehr-i mü’eccelim ve nafaka-i iddet-i ma‘lûmem ve me’ûnet-i süknâm dahi kendi üzerime olmak üzere ve mezbûrun firâşından mütevellid Mehmed nâm sagīr ile hamlim hayyen zuhûr ederse hakk-ı hıdâne benimdir deyü nafaka ve kisve taleb etmemek üzere zevcim mezbûr Habib ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete ve gayra müte‘allika âmme-i de‘âvîden her birimiz âharın zimmetini ibrâ-i âmla ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî gurre-i Şa‘bâni’l-mu‘azzam sene 1072 Şuhûdü’l-hâl: Abdurrahman Efendi el-imâm, Halil Çelebi b. Mustafa Müezzin, Mehmed Beşe b. Himmet, Sefer Beşe b. Hüseyin, Abdullah b. Mustafa, Mustafa b. Mehmed, el-Hâc Hüseyin b. Himmet.