İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 179 Hüküm no: 124 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akmescid mahallesinde kırk sekizinci ağa bölüğü odasının mühimmatı için vakf olan paranın on yıllık gelirinin mütevellisinden taleb edilmesi Husûs-ı âti’l-beyânın mahâllinde tahrîri için savb-ı şer‘den Mevlânâ es-Seyyid İbrahim Efendi irsâl olunup ol dahi zeyl-i vesîkada muharrerü’l-esâmî Müslimîn ile mahmiye-i İstanbul’da Alaca Mescid mahallesinde sâkin olup yeniçeri tâifesinin eski odalarında vâki‘ kırk sekizinci ağa bölüğü odasının mühimmâtı için vakf olunan yüz altmış bin akçe nukūdun mütevellîsi olan el-Hâc Sefer Beşe b. Ahmed nâm kimesnenin mülk menziline varıp akd-i meclis-i şer‘ eyledikde zikri sebk eden oda cemâ‘atinden nukūd-ı mevkūfe-i mezbûreye hasbî nâzır olanlardan merkūm odada odabaşı olan Mustafa Beşe b. Ali ve Mahmud Beşe b. Ali ve Hüseyin Beşe b. Malkoç ve Mehmed Beşe b. Yusuf ve İlyas Beşe b. İbrahim ve Ahmed Beşe b. Mustafa ve diğer Ahmed Beşe b. Ali ve Habib Beşe b. Rıdvan nâm kimesneler ve sâirleri meclis-i ma‘kūd-ı mezbûrda mütevellî-yi mezbûr el-Hâc Sefer mahzarında üzerine her biri bi’n-nezâre takrîr ve da‘vâ edip mezbûr el-Hâc Sefer nukūd-ı merkūmeye cümlemiz ma‘rifetiyle bundan akdem bin altmış üç senesinde mütevellî olup asl-ı mal-ı mevkūf-ı mezbûr yüz altmış bin akçeyi kabz ve irbâh eyleyip târih-i mezbûrdan bin yetmiş bir senesine gelince her on akçesi on bir akçe hesâbı üzere mürâbahasını bi’t-tamam ahz u kabz eyleyip hâlâ mezbûrun zimmetinde asl-ı mal-ı mezbûr yüz altmış bin akçe hesâb-ı mezbûr üzerine bir sene murâbahası olan on altı bin akçe dahi ki cem‘an yüz yetmiş altı bin akçe eder nezâretimiz hasebiyle târih-i kitâbdan dört gün mukaddem meblağ-ı merkūmu mezbûrdan taleb eylediğimizde meblağ-ı merkūm zimmetimdedir lâkin meblağ-ı mezbûru işbu sâkin olduğum menzilin müceddeden binâsına harc ve sarf edip mal-ı vakf-ı mezbûr ile binâ eyledim deyü ikrâr etmiş idi. Hâlâ suâl olunup ba‘de’l-ikrâr ikrârı tahrîr ve cânib-i şer‘den temessük taleb ederiz dediklerinde gıbbe’s-suâl ve akībe’l-inkâr mezbûrlardan minvâl-i muharrer üzere ikrârını mübeyyin beyyine taleb olundukda udûl-i ricâlden olup tâife-i mezbûrenin kırk dokuzuncu bölüğünden Mehmed Çelebi b. Ali ve ellinci bölükden Receb b. Şaban ve 30 üçüncü bölükden İbrahim b. Yakub nâm kimesneler meclis-i şer‘a li-ecli’ş-şehâde hâzırûn olup isre’l-istişhâd fi’l-vâki‘ mezbûr el-Hâc Sefer târih-i mezbûrdan zikri sebkeden odanın orta akçesinden olup tevliyetim hasebiyle bir sene murâbahasıyla zimmetimde olan yüz altmış altı bin akçeyi işbu sâkin olduğum menzile harc ve sarf eyledim ve işbu binâyı mal-ı vakf-ı mezbûr ile eyledim deyü bizim huzûrumuzda ikrâr eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde şuhûd-ı mezkûre mahâllinde tezkiye olunduklarında elli üçüncü bölükden Ali b. Mahmud ve elli bölükden Mahmud b. Abdi ve elli bölükden sâbıkā seroda Ali Beşe b. Kasım ve kırk yedi bölükden Mustafa Çavuş b. Ahmed ve 51 bölükden Osman Beşe b. Abdullah ve mezbûr bölükden Ali Beşe b. Abdullah ve Mustafa b. İsa ve Mehmed b. Mustafa nâm kimesneler ve sâirleri mezbûrlar haklarında iyi adamlardır ve makbûlü’ş-şehâdelerdir deyü her biri bi’l-muvâcehe hüsn-i hâllerini haber verdiklerini mevlânâ-yı mezbûr mahâllinde tahrîr ve ma‘an irsâl olunan Mustafa b. İsa ile meclis-i şer‘a gelip alâ-vukū‘ihî inhâ ve takrîr edicek vâki‘u’l-hâl bi’t-taleb ketb olundu. Fi’l-hâmis min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Receb Çelebi b. Abdullah 50 B., Ali Beşe b. Abdullah 58 B Vekîlharc, Mehmed b. Ali 49 B Seroda, Süleyman b. İbrahim 50 K., Mustafa b. İsa.