İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 180 Hüküm no: 125 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varat kalesi yeniçerilerinden Ahmed Ağa b. Yusuf’un Rumeli ve Anadolu’da olan alacaklarının tahsili İkrâr ba‘de’l-beyyine. Vilâyet-i Rumeli’nde Varat kal‘asında nevbetci olan Dergâh-ı âlî yeniçerilerinden otuz birinci bölük çorbacısı fahrü’l-akrân Ahmed Ağa b. Yusuf tarafından zimem-i nâsda olan hukūkunu da‘vâ ve taleb ve ahz u kabza ve kendiye îsâle vekîl olup Kenan Beşe b. Abdullah ve İbrahim Beşe b. Mehmed şehâdetleri ile şer‘an vekâleti sâbite olan kayınatası işbu râfi‘u’l-kitâb fahrü’l-emâcid ve’l-ekârim İsmail Efendi b. Mustafa meclis-i şer‘de el-Hâc Mustafa b. el-Hâc Mehmed mahzarında bi’l-vekâle üzerine da‘vâ ve takrîr-i kelâm edip müvekkil-i mûmâ-ileyhin vilâyet-i Anadolu’da Menteşe alaybeyisi zimmetinde olan beş yüz on bin guruş ve Aydın alaybeyisi zimmetinde olan üç yüz elli riyâlî guruş ve Muslu Beyoğlu zimmetinde olan yüz riyâlî guruş ki cem‘an dokuz yüz altmış kıt‘a riyâlî guruşu ahz u kabza ve bana îsâle vekîl ve âharı yerine tevkîle me’zûn olan Yahya Beşe nâm râcil hâcc-ı şerîfe gider oldukda meblağ-ı mezbûru merkūmdan ahz u kabza ve bana îsâle mezbûr el-Hâc Mustafa’yı tarafından vekîl edip ol dahi ba‘de kabûlü’l-vekâle zikrolunan dokuz yüz altmış riyâlî guruşun her biri mukābelesinde yüz kırk akçe almış iken ol dokuz yüz altmış riyâlî guruşun her biri mukābelesinde yüz on akçe hesâbı üzere mezbûr el-Hâc Mustafa meblağ-ı mezbûru poliçe edip gāibûn Tireli el-Hâc Osman ve diğer el-Hâc Osman ve Çakalzâde Hacı Mehmed ve Minkaroğlu Mehmed Çelebi ve Ahmed Çelebi nâm kimesneler yedlerinden hurde akçe ve altın ve guruş bana teslîm olunmuşidi. Hâlâ her guruş yüz kırk akçe hesâbı üzere merkūm el-Hâc Mustafa’nın makbûzu olan dokuz yüz altmış guruşun fazlası olan yirmi sekiz bin sekiz yüz akçeyi mezbûrdan taleb ederin suâl olunsun dedikde gıbbe’s-suâl mezbûr el-Hâc Mustafa cevâbında fi’l-vâki‘ ol diyârda guruş yüz kırk akçe râyic olmağın meblağ-ı mezbûru ol hesâb üzere istifâ eylediğimden sonra gāibûn-ı mezbûrun ile poliçe edip müşârun-ileyh İsmail Efendi’ye teslîm eylediler deyü her bir guruş yüz kırk akçe hesâbı üzere ahz eylediğini ikrâr eylemeğin alâ-mûceb-i ikrârihî fazla-i mezkûru edâya mezbûr el-Hâc Mustafa’ya tenbîh birle mâ-vaka‘a bi’t-taleb ketb olundu. Fî-gurreti Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Mehmed Çelebi b. Mustafa, el-Hâc Ahmed b. Mahmud, Mustafa b. Ali, Abdi Çelebi b. Hüseyin, Şükrullah [b.] Mustafa.