İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 185 Hüküm no: 132 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çocuksuz ölen İstravin’in Beytülmala kalması gereken terekesinde Kalo bt. Bareşko tarafında alınan para için gösterilen müteselsil kefiller Kefâlet Mahmiye-i İstanbul’da el-Hâc Muhyiddin mahallesi sükkânından Kosta v. Petro ve Anderya v. Anderya ve Rose v. Nikola ve Antaş v. Dimo ve Nikola v. Maden ve Plaşa bt. Yemandi nâm zimmîler meclis-i şer‘de hâlâ Hâssa Beytü’l-mâl Emîni olan Abdurrahim Ağa b. Mehmed mahzarında her biri takrîr-i kelâm edip mahalle-i mezbûrede sâkin iken bundan akdem bilâ-vâris hâlik olan İstrati nâm zimmînin cemî‘ terekesi cânib-i beytü’l-mâle â’id ve râci‘ iken hâlik oldukda terekesinden on altı bin iki yüz akçeyi işbu hâzıra bi’l-meclis Kalo bt. Bareşko nâm Nasrâniye kabz etmekle meblağ-ı mezbûra her birimiz emr ve kabûlü hâviye kefâletle kefîller olduk dediklerinde gıbbe’t-tasdîk mezbûrenin nefsine ve gaybet ve firâr ederlerse meblağ-ı mezbûre Südcü Kosta v. Panayot dahi emr ve kabûlü hâviye kefâletle kefîl oldukdan sonra mezbûr Kosta’nın nefsine ve gaybet ve firâr ederse meblağ-ı mezbûra Papa Yani nâm zimmî dahi emr ve kabûlü hâviye kefâletle kefîl oldukdan sonra ve Peder Yani’nin dahi nefsine ve gaybet ve firâr ederse meblağı mezbûra Tarandafilo v. Porli nâm zimmî emr ve kabûlü hâviye kefâletle kefîl olmağın vâki‘u’l-hâl mezbûr Abdurrahman Ağa talebi ile ketb ve yedine def‘ olundu. Fi’t-tâsi‘ aşer min-Recebi’l-ferd li-sene isneyn ve seb‘în ve elf. Şuhûdü’l-hâl: Mehmed Beşe b. ( ), Mustafa Çelebi b. ( ), Durmuş Çelebi b. ( ), Mehmed Çelebi b.( ), Receb Çelebi b. ( ).