İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 185 Hüküm no: 131 Orijinal metin no: [13b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtibmuslihiddin mahallesi avarız vakfından İsmihan bt. Ali’nin evi karşılığında aldığı borç para Mahmiye-i İstanbul’a Kâtib Muslihiddin mahallesinin avârızı için mevkūf nukūdun bi’l-fi‘il mütevellîsi olan işbu râfi‘u’l-kitâb Mustafa Efendi b. Mehmed meclis-i şer‘de Koca Mustafa Paşa mahallesinde sâkine İsmihan bt. Ali tarafından da‘vâ-yı âtiyede husûmet ve redd-i cevâba vekîl olup müvekkile-i mezbûrenin zâtına ma‘rifet-i şer‘iye ile ârifân olan Ali b. Mustafa ve Mustafa b. Mehmed şehâdetleri ile şer‘an vekâleti sâbite olan Ali b. Şaban mahzarında üzerine da‘vâ ve takrîr-i kelâm edip mütevellîsi olduğum avârız akçesinin asl-ı mâlından müvekkile-i mezbûre İsmihan zimmetinden on iki bin akçe olup hatta bin altmış bir Zilhiccesi’nde huzûr-ı Müslimînde minvâl-i muharrer üzere zimmetinde asl-ı mal-ı vakf-ı mezbûrdan on iki bin akçe deyni olduğunu ikrâr ve meblağ-ı mezbûr mukābelesinde zikrolunan Mustafa Paşa mahallesinde vâki‘ bir tarafdan Kâtib Ömer mülküne ve bir tarafdan Uncu Mustafa mülküne ve bir tarafdan Âişe Hatun mülküne ve bir tarafdan tarîk-i âmma müntehî olan mülk menzilini meblağ-ı mezbûr mukābelesinde istiğlâl-i şer‘î tarîki üzere katımda rehin vaz‘ eylemiş idi. Hâlâ asl-ı mal-ı mezbûru tevliyetim hasebiyle taleb ederim suâl olunsun dedikde gıbbe’s-suâl ve’l-inkâr müdde‘î-yi mezbûrdan müdde‘âsını mübeyyin beyyine taleb olundukda udûl-i ricâl-i Müslimînden olup mahalle-i mezbûre Koca Mustafa Paşa mahallesi sükkânından Arslan Bey b. Abdullah nâm Sarrâc-ı Sultan ve İbrahim b. Muharrem nâm kimesneler li-ecli’ş-şehâde meclis-i şer‘a hâzırân olup isre’l-istişhâd ve fi’l-vâki‘ bin altmış bir Zilhiccesi’nde müvekkile-i mezbûre İsmihan bizim huzûrumuzda vakf-ı mezbûrun asl-ı mâlından zimmetinde on iki bin akçe deynim vardır deyü ikrâr ve menzil-i mezbûru istiğlâl tarîki üzere rehin vaz‘ edip biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’iti’’l-kabûl ve şehâdetleri makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâmin min-Şa‘bâni’l-mu‘azzam sene [10]72. Şuhûdü’l-hâl: el-Hâc Ahmed b. Mahmud, Hasan b. Mustafa, Mehmed b. Ramazan, Rasûl b. Rıdvan.