İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 186 Hüküm no: 134 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Mustafapaşa mahallesinde Yorgi ve Plaşa tarafından satın alınan ev Mülknâme. Dârü’l-hilâfeti’l-aliyye Kostantıniyyeti’l-mahmiye’de Mustafa Paşa mahallesinde sâkine Aleksandıra bt. Yanaki nâm Nasrâniye meclis-i şer‘de kendi tarafından asîl ve zevcesi Plaşa bt. Liyani nâm Nasrâniye tarafından ikrâr-ı âti’z-zikri tasdîka sâbitü’l-vekâle vekîl olan Yorgi v. Nikola nâm zimmî muvâcehesinde ikrâr ve i‘tirâf edip mahalle-i mezbûrede vâki‘ bir tarafı Vasil nâm zimmî menziline ve bir tarafı kilise duvarına ve iki tarafı tarîk-i âmma müntehî fevkānî bir kebîr şehnişînli oda ve bir sagīr oda ve iki sofa ve tahtında mahzen ve bir su kuyusunu müştemil mülk menzilimi bi-cümleti’t-tevâbi‘ ve’l-levâhık mezbûrân Yorgi ve Plaşa’ya tarafeynden îcâb ve kabûlü hâvî bey‘-ı bâtt-ı sahîh-i şer‘î ile mukaddemâ yüz kıt‘a riyâlî kebîr guruşa bey‘ ve teslîm onlar dahi ale’l-iştirâki’s-seviy iştirâ ve kabûl ve kabz ve tesellüm eylediklerinden sonra semeni olan meblağ-ı mezbûr yüz kıt‘a riyâlî kebîr guruşu mezbûrân yedlerinden bi’t-tamam ve’l-kemâl ahz u kabz eyledim ba‘de’l-yevm menzil-i mahdûd-ı mezbûr mezbûrânın mülk-i müşterâları olmuşdur. Benim alâka ve medhalim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâmis min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: es-Sâbıkūn. Panayot v. Vasil, Dimo v. Yani, Rani v. Manol, Mumcu Yanaki v. ( ), Çukacı Panayot v. ( ).