İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 187 Hüküm no: 135 Orijinal metin no: [14a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kimsesi olmadığından terekesi bulunduğu odaya kalması gereken yeniçeri Murad Beşe b. Abdullah’ın mirası İbrâ. Dergâh-ı âlî yeniçerilerinin birinci ağa bölüğüne mahsûs odada hâlâ odabaşı olan Mustafa Beşe b. ( ) tarafından ikrâr-ı câ’i’z-zikre vekîl olup vekâleti Süleyman Beşe b. Hasan ve Ahmed Beşe b. Veli şehâdetleriyle şer‘an vekâleti sâbite olan Mehmed Beşe b. Süleyman meclis-i şer‘de işbu bâ‘isü’s-sifr Todori v. Dimitri nâm zimmî muvâcehesinde bi’l-vekâle ikrâr ve takrîr-i kelâm edip oda-i mezkûre neferâtından bilâ-vâris fevt olan kimesnelerin beytü’l-mâlı taraf-ı saltanat-ı aliyyeden oda-i mezkûre mühimmâtına hâsıl kaydolunup zikrolunan oda neferâtından bundan akdem bilâ-vâris fevt olan Murad Beşe b. Abdullah’ın muhallefâtından vilâyet-i Rumeli’nde Yenişehir nâhiyesinde Büyük Kirasova nâm karyede vâki‘ iki tarafı Tarandafilo nâm zimmî mülküne ve iki tarafı tarîk-i âmma müntehî bir bâb fevkānî ve bir bâb tahtânî oda ve muhavvâtayı müştemil menzilini ve yine karye-i mezkûre sınırı dâhilinde vâki‘ bir tarafı Nikola bağı ve bir tarafı Pemali bağı ve bir tarafı Todori tarlası ile mahdûd mülk bağı ve bir şırahânesi ba‘de vefâtihî zâhirde ma‘rûf vârisi olmayıp terekesi kānûn-ı pâdişâhî üzere zikrolunan oda ahâlîsine râci‘ olmağla mezbûr Todori’den zikrolunan menzili ve bağı ve şırahâneyi da‘vâ ve taleb eyledikde ol dahi zikrolunan menzili müteveffâ-yı mezbûr hâl-i hayatında gāib ani’l-meclis Serdar Ali Ağa’ya ve bağ-ı mezkûru ve şırahâneyi Dimitri nâm zimmîye semen-i misilleri ile bey‘ etmekle ben dahi mezbûrândan iştirâ eyledim deyü def‘le mukābele edip müvekkilim mezbûr odabaşı dahi inkâr eyledikde ol dahi müdde‘âsını isbât sadedinde olmağla beynlerinde münâza‘ât-ı kesîr vâki‘ olmuş idi. El-hâletü-hâzihî tavassut-ı muslihîn ile da‘vâ-yı merkūmeden mezbûr Todori müvekkil-i mezbûr ile dokuz bin akçe üzerine inşâ-i akd-i sulh eylediklerinde müvekkil-i mezbûr dahi sulh-ı mezbûru kabûl ve bedel-i sulh olan meblağ-ı mezbûr dokuz bin akçeyi ahz u kabz edip ba‘de’l-yevm müteveffâ-yı mezbûrun terekesinden zikri mürûr eden menzil ve bağ ve şırahâneye müte‘allika da‘vâdan mezbûr Todori’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâmin min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Mustafa Bey Ser-sarrâc, Mehmed Beşe b. Süleyman, Ahmed Beşe b. Veli, Mehmed Beşe b. Süleyman, Ahmed Beşe b. Mehmed, Ali Beşe b. Mustafa, Ali Çelebi-yi Yorganî, Kâtib Ahmed Çelebi, İvaz Beşe b. Mehmed, Mehmed Çelebi b. Hasan, Osman Beşe b. Şaban.