İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 197 Hüküm no: 150 Orijinal metin no: [16a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Eflak Beyi Yorgikaka? v. Miha’nın Osman Ağa b. Kasım’a olan borcu İkrâr-ı deyn, kefâlet. Husûs-ı âti’l-beyânın mahâllinde tahrîri iltimâs olunmağın kıbel-i şer‘den Mevlânâ Mehmed Efendi irsâl olunup ol dahi mahmiye-i İstanbul’da Hoca Üveys mahallesinde sâkin el-Hâc Osman Ağa b. Kasım nâm kimesnenin sâkin olduğu menziline varıp zeyl-i kitâbda mastûrü’l-esâmî olan huzûrunda akd-i meclis-i şer‘-i şerîf eyledikde mahmiye-i mezbûrede Fenârkapısı hâricinde Abdi Subaşı mahallesinde sâkin sâbıkā Eflak Beyi olan Yorgikaka v. Miha nâm nasrânî meclis-i ma‘kūd-ı mezbûrda işbu hâfızü’l-kitâb fahrü’l-emâsil ve’l-akrân mezkûr el-Hâc Osman Ağa muvâcehesinde ikrâr ve takrîr-i kelâm edip mûmâ-ileyh Osman Ağa’ya zimmetimde târih-i kitâbdan yüz seksen gün tamamına değin mü’eccel-i mev‘ûd olmak üzere altı bin esedî guruş vâcibü’l-edâ ve lâzımü’l-kazâ deynim olup meblağ-ı mezbûr mukābelesinde mahalle-i mezbûrede vâki‘ silk-i mülkümde münselik hakkım olup bir tarafı Todoraki mülküne ve bir tarafı Hüseyin Ağa mülküne ve bir tarafı sâhil-i bahra ve bir tarafı tarîk-i âmma müntehî mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mûmâ-ileyh el-Hâc Osman Ağa katında ba‘de’t-tahliyeti’ş-şer‘iye rehne vaz‘ ve teslîm edip ol dahi irtihân ve tesellüm ve kabûl eyledikden sonra yine mahmiye-i mezbûrede Abdi Subaşı mahallesinde sâkin Manol v. Petro nâm zimmî menzil-i mezbûrun derkine ve meblağ-ı mezbûr bin esedî guruşa emr ve kabûlü hâviye kefâlet-i sahîha-i şer‘iye ile kefîl oldum dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde tahrîr ba‘dehû ma‘an irsâl olunan Eyüb b. Ali ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’s-sâbi‘ min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Ahmed Ağa b. Mehmed Çorbacı B 25, Mehmed Ağa b. Piyale el-cündî, Ahmed Ağa b. Hüseyin el-Yesârî, Kenan Ağa b. Abdullah er-râcil, Mustafa Çelebi b. Durmuş er-râcil, el-Hâc Osman b. Mustafa er-râcil, Mehmed Ağa b. el-Hâc Alizâde, İbrahim Ağa b. Hüseyin.