İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 197 Hüküm no: 149 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiralama yoluyla yeniçerilerin otuzuncu cemaati nukud vakfı mütevellisi Mehmed Çelebi’nin Sâliha Hatun bt. Hüseyin Efendi’nin Yenikapı haricinde bulunan evini satın alması İstiglâl. Mahmiye-i İstanbul’da Yeniodalar başında Mustafa Ağa mahallesinde sâkine Sâliha Hatun bt. Hüseyin Efendi meclis-i şer‘de Dergâh-ı âlî yeniçerilerinin otuzuncu cemâ‘atine mahsûs oda mühimmâtı’çün mevkūf nukūdun bi’l-fi‘il mütevellî olan işbu râfi‘u’l-kitâb Mehmed Çelebi b. ( ) tarafından ikrâr-ı âti’z-zikri tasdîka vekîl olup nehc-i şer‘î üzere vekâleti sâbite olan Ali Çelebi b. Mustafa Efendi mahzarında ikrâr ve takrîr-i kelâm edip akd-i âtî sudûruna dek silk-i mülkümde olup Yenikapı hâricinde vâki‘ bir tarafdan Bedros nâm zimmî tasarrufunda olan vakf odalara ve bir tarafdan sâhil-i bahra ve bir tarafdan arsa-i hâliyeye ve bir tarafdan tarîk-i âmma müntehî olan menzilimi bi-cümleti’t-tevâbi‘ ve’l-levâhık mütevellî-yi mezbûr Mehmed Çelebi’ye istiğlâl-i şer‘î tarîki üzere yirmi bin râyic fi’l-vakt akçeye bey‘ ve teslîm ve kabz-ı semen-i mezkûr edip ol dahi minvâl-i muharrer üzere mal-ı vakf-ı mezbûr ile iştirâ ve tesellüm ve def‘-i semen-i mezbûr eyledikden sonra yine menzil-i mahdûd-ı mezbûru ba‘de’t-tahliyeti’ş-şer‘iye ve’t-takābuzi’l-mer‘î târih-i kitâbdan bir sene tamamına dek üç bin akçe ücret ile mütevellî-yi mezbûrdan istîcâr ve tesellüm ol dahi minvâl-i muharrer üzere menzil-i mezbûru bana îcâr ve teslîm eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sânî min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: İbrahim Beşe er-râcil, Mehmed Çelebi er-râcil, Ali Beşe er-râcil, Mehmed Beşe er-râcil, el-Hâc Sinan er-râcil.