İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 198 Hüküm no: 152 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirak v. Yanoş’un mirasının çocukları arasında taksimi Taksît. Mahmiye-i İstanbul’da Altımermer kurbünde sâkin iken bundan akdem hâlik olan Mirak v. Yanoş nâm Ermeninin verâseti sulbî kebîr oğlu Durmuş’a ve sulbiye kebîre kızı Gevher’e münhasıra olduğu şer‘an zâhir ve müte‘ayyin oldukdan sonra mezbûr Durmuş meclis-i şer‘de mezbûre Gevher tarafından husûs-ı âti’z-zikre vekîl olup Barados v. Karabet ve Mardiros v. Pars’ın şehâdetleri ile şer‘an vekâleti sâbite olan zevci Vonik v. Manik nâm Ermeni mahzarında bi’l-vekâle ikrâr ve i‘tirâf edip mukaddemâ müvekkile-i mezbûre hâlik-i mezbûrun cemî‘ terekesinden kendiye isâbet eden üç sehimden bir sehm hissesi mukābelesinde bi-tarîkı’t-tahârüc ben tereke-i hâlik-i mezbûra vâzı‘u’l-yed olmağla benimle dört bin akçe üzerine inşâ-i akd-i sulh olup bedel-i sulh olan meblağ-ı mezbûrun bi’d-defa‘ât bin akçesini yedinden ahz u kabz edip bâkī üç bin akçesi zimmetimde kalıp hâlâ meblağ-ı mezbûru def‘aten edâya iktidârım olmayıp taksîte tâlib olmağla beher şehr ikişer yüz akçe vermek üzere târih-i kitâbdan on beş ay tamamına değin vekâleten taksît edip ben dahi taksît-i mezbûru kabûl ve meblağ-ı mezbûru edâya ta‘ahhüd eyledim dedikde gıbbe’t-tasdîk mâ-vaka‘a bi’t-taleb ketb olundu. Fî-gurreti Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Şükrullah b. Mustafa, Rasûl b. Rıdvan, Mehmed b. Ramazan, Abdi b. Hüseyin.