İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 199 Hüküm no: 153 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Abdurrahman’ın ortağı olan Süleyman Efendi’nin varislerine zimmetinde olan paralarını verdiği Mahmiye-i İstanbul’da Haraçcı Muhyiddin mahallesinde sâkin iken vefât eden Süleyman Efendi’nin vasîyy-i muhtârı ve zevce-i metrûkesi Sâliha Hatun ile kebîre kızı Afife Hatun taraflarından meblağ-ı câ’i’z-zikri kabza vekîl olup nehc-i şer‘î-yi mu‘teber üzere vekâleti sâbite olan fahrü’l-kuzâtü’l-İslâm Gümüşîzâde Yahya Efendi b. Mehmed Efendi meclis-i şer‘de hâfızü’l-kitâb Osman b. Abdurrahman huzûrunda vesâyeten ve vekâleten ikrâr ve takrîr-i kelâm edip müteveffâ-yı mezbûrun mezbûr Osman yedinde mal-ı mudârebeden olan iki yüz esedî guruş ile müvekkilem mezbûre Sâliha’nın dahi mezbûr Osman zimmetinde deyn-i şer‘îden olan otuz esedî guruş ve mezbûre Afife’nin yirmi esedî guruş hakkını ki cem‘an iki yüz elli esedî guruş vesâyet ve vekâletim hasebiyle mezbûr Osman yedinden tamamen alıp eyledim min-ba‘d mezbûr Osman’ın zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâbi‘ min-Şa‘bâni’l-mu‘azzam sene [10]72. Şuhûdü’l-hâl: İbrahim Çelebi b. Hüseyin, Mustafa b. Yahya, Veli b. Ali, Receb Efendi b. Hüseyin, Hüseyin Efendi el-Burûsî, Şükrullah b. Mustafa.