İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 204 Hüküm no: 158 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan bt. Yahya’nın Katalan cemaatinden Abraham v. Samiriye’de olan alacağını taksite bağlaması Hüccet-i taksît. Mahmiye-i İstanbul’da Tahtaminâre mahallesinde sâkin iken vefât eden Mustafa Çavuş b. İsa’nın verâseti zevce-i metrûkesi Sultan bt. Yahya’ya ve sagīre kızları Kerîme ve Fâtıma ve Rahime ve Âişe’ye münhasıra olduğu şer‘an zâhir oldukdan sonra sagīrât-ı mezbûrâtın vasîyy-i şer‘iyeleri ve vâlideleri mezbûre Sultan Hatun meclis-i şer‘de mahmiye-i mezbûrede Balıkpazarı hâricinde mütemekkin Katalan cemâ‘atinden Abraham v. Samiriye nâm masûracı Yahûdî mahzarında bi’l-vesâye ikrâr ve takrîr-i kelâm edip mûrisim müteveffâ-yı mezbûrun Yahûdî-yi mezbûr zimmetinde karz-ı şer‘îden yüz elli riyâlî guruş hakkı olup kable’l-ahz vefât edip meblağ-ı mezbûr ırsen benim ile sagīrât-ı mezbûrâta intikāl eylemeğin bundan akdem meblağ-ı mezbûru Yahûdî-yi mezbûrdan taleb eylediğimde ol dahi inkâr ve ben dahi müdde‘âmı şuhûd-ı udûl şehâdetleri ile muvâcehesinde isbât edip edâsına hükm-i şer‘î lâhık oldukdan sonra hâlâ meblağ-ı mezbûrdan kırk guruşunu yedinden alıp kabz edip bâkīsi olan yüz on riyâlî guruşa def‘ ve edâya iktidârı olmamağın asâlet ve vesâyetim hasebiyle her otuz günde yirmi ikişer riyâlî guruşu vermek üzere yüz elli gün tamamına dek Yahûdî-yi mezbûru tahtîm ve taksît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrî[ren] fi’s-sâlis min-Şa‘bâni’l-mu‘azzam li-sene el-mezbûr. Şuhûdü’l-hâl: el-Hâc Ahmed b. Mahmud, Veli b. Mahmud Mirza, Mustafa Çelebi b. Mahmud, Ali b. Mahmud, İbrahim Çavuş b. el-mübâşir, İbrahim b. Mustafa, Musa Çavuş b. Hasan Ağa.