İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 217 Hüküm no: 166 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden eski Sakız kadısı Müezzinzâde Ahmed Efendi b. Mehmed Efendi’den kalan Ferhad Ağa mahallesindeki arsanın satılarak borçlarının ödenmesi Sâbıkā Sakız kādısı olup hâlâ terk-i âlem-i fânî eden merhûm Müezzinzâde Ahmed Efendi b. Mehmed Efendi’nin hasran vârisleri olan sulbî kebîr oğulları Hamdi ve Mehmed ile sulbiye sagīre kızı Hadice’nin vasîyy-i şer‘îleri olan fahrü’l-kuzâtü’l-İslâm Mustafa Efendi [b.] el-Hâc Ebûbekir meclis-i şer‘de işbu râfi‘u’l-kitâb Abdi Bey b. Hızır nâm cündî mahzarında bi’l-vesâye ikrâr ve takrîr-i kelâm edip mahmiye-i İstanbul’da Çinili Hamam kurbünde Ferhad Ağa mahallesinde vâki‘ bir tarafdan zikrolunan Ferhad Ağa Mescid-i şerîfine ve bir tarafdan Haraççı Vakfı’ndan olup hamam-ı mezbûrun külhanına muttasıl olan odalara ve bir tarafdan mârrü’z-zikr Çinili Hamam’a ve bir tarafdan tarîk-i âmma müntehî buyût-i adîdeyi hâvî olup bin yetmiş Zilka‘desinin on altıncı gününde vâki‘ olan harîk-i gālibde muhterik olan menzil arsası ile’l-vefât merhûm-ı mezkûrun mülkü olup ba‘de vefâtihî sıgār-ı mezbûrûna ırsen intikāl eylemiş idi. Lâkin müteveffâ-yı mezbûrun düyûn-ı kesîresi ve sıgār-mezkûrûnun nafakaları için arsa-i mezkûrenin şer‘an bey‘i lâzım olmağın bundan akdem ba‘de’l-izni’ş-şer‘î arsa-i mezbûre beyne’t-tâlibîn ve’r-râgıbîn nidâ ve müzâyede olunup ragabât-ı nâs bi’l-külliye münkatı‘a oldukda arsa-i menzil-i mezkûr merkūm Abdi Bey üzerinde semen-i misli olan seksen bin akçede karâr edip ziyâde akçe ile âhar tâlib zuhûr etmemeğin arsa-i mezkûreyi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık zarûret-i düyûn-ı müsbetesi ve zarûret-i nafakaları için mezbûr Abdi Bey’e vesâyetim hasebiyle râyic fi’l-vakt seksen bin akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm ol dahi minvâl-i muharrer üzere nefsi için mâlıyla iştirâ ve tesellüm ve kabûl eyledikden sonra semeni olan meblağ-ı mezbûru bi’t-tamam ve’l-kemâl vesâyetim hasebiyle mezbûr Abdi Bey yedinden alıp kabz eyledim ba‘de’l-yevm arsa-i mezkûr merkūm Abdi Bey’in mülk-i müşterâsıdır mutasarrıf olsun dedikde gıbbe’t-tasdîkı’ş-şer‘î zeyl-i rakīmde esâmîleri mastûr olan Müslimîn ve sikāt-ı muvahhidîn semen-i mezkûr arsa-i merkūmenin semen-i misli olduğu alâ-tarîkı’ş-şehâde haber verdiklerinde bey‘-ı mezkûrun sıhhatine ba‘de’l-hükm mâ-vaka‘a bi’t-taleb ketb olundu. Fi’l-hâdî aşer min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Efdalü’l-müderrisîn Mahmud Efendi b. Ali, Hâfız Mustafa Efendi el-müderris, Receb Efendi b. Ahmed el-imâm, Mustafa b. Sinan, Bâyezid Halîfe el-müezzin, Mustafa Bey b. Mehmed, Abdullah Çelebi b. Receb, Mehmed el-münâdî.