İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 216 Hüküm no: 165 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divriği kazasının Zimara köyünde ölen Horos v. Toros’un terekesinin varislerine taksimi Vilâyet-i Anadolu’da Divriği kazâsı muzâfâtından Zimara nâm karyede sâkin iken hâlik olan Horos v. Toros nâm zimmînin verâseti zevce-i metrûkesi Seltan bt. Kurd nâm Ermeniyeye ve sulbî kebîr oğulları Karabet ve Astadora ve Vasik ve Nikoz nâm Ermeniler ile sulbiye kebîre kızı Başok nâm Ermeniyeye münhasıra ve tashîh-i meseleleri yetmiş iki sehm olup sihâm-ı merkūmeden dokuz sehmi merkūme Seltan’a ve on dört sehmi merkūmûna ve yedi sehmi mezbûreye isâbet eylediği şer‘an zâhir oldukdan sonra oğulları merkūmûn meclis-i şer‘de hâfızü’l-vesîka Kirkor v. Begos nâm Ermeni muvâcehesinde her biri tav‘an ikrâr ve takrîr-i kelâm edip babam muhallefâtından karye-i merkūme sınırı dâhilinde ba‘de’t-taksîm bizim hissemize ta‘yîn ve tahsîs olunup bir tarafı mezbûr Kirkor bağına ve bir tarafı Bahıroğlu bağına ve bir tarafı Milan ve bir tarafı Sarı Murad bağına müntehî bir kıt‘a bağını ve yine iki tarafı mezbûr Kirkor bağına ve bir tarafı Murad bağına ve bir tarafı tarîk-i âmma müntehî bir kıt‘a bağını içinde olan mülk ceviz eşcârı ile lede’l-ahâlî ma‘lûmü’l-hudûd mülk harâbesini hâlik-i mezbûrun düyûn-ı kesîre-i müsbetesi için altmış riyâlî guruşa mezbûr Kirkor’a safka-i vâhide ile bâtten bey‘ ol dahi ber-minvâl-i muharrer iştirâ ve kabûl ve Tavşantarlası’nda vâki‘ babamız hâlik-i mezbûrun tasarrufunda olup âdiyen bize intikāl edip karye-i merkūmeye cereyân eden su ile saky olunan iki tarafı mezbûr Kirkor tarlasına ve bir tarafı Agop Ermeni tarlasına ve bir tarafı Avram Beyoğlu tarlasına müntehî bir kıt‘a tarlasını ve yine bir tarafı Vartik Ermeni tarlasına ve bir tarafı İsa Kethudâ tarlasına ve bir tarafı Kemâl tarlasına ve bir tarafı tarîk-i âmma müntehî bir kıt‘a tarlasını ve yine bir tarafı mezbûr Kirkor tarlasına ve bir tarafı mezaristâna ve bir tarafı Duyaroğlu tarlasına ve bir tarafı tarîk-i âmma müntehî bir kıt‘a tarlasını ve yine bir tarafı mezbûr Vartik tarlasına ve bir tarafı dağa ve bir tarafı dereye ve bir tarafı tarîk-i âmma müntehî bir kıt‘a tarlasını ve yine bir tarafı mezbûr Kirkor bostanına ve bir tarafı Vartik bostan yerine ve iki tarafı tarîk-i âmma müntehî bir kıt‘a bostan yerini sahib-i arz izni ile elli riyâlî guruş bedel mukābelesinde mezbûr Kirkor’a ferâğ ve tefvîz ol dahi ber-minvâl-i muharrer tefevvüz ve kabûl eyledikden sonra semen-i mezbûr altmış riyâlî guruş ile bedel-i mezbûr elli riyâlî guruş ki cem‘an yüz on riyâlî guruş yedinden kabz edip mahâllinde kabza mezkûr Kirkor’u taslît eyledik, min-ba‘d ol bağlar ile harman yeri mülk-i müşterâsı ve tarlalar ile bostan yeri hakk-ı müfevvazı olup keyfe mâ yeşâ mutasarrıf olsun dediklerinde mâ hüve’l-vâki‘ bi’t-taleb ketb olundu. Fî 7 min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Hüseyin el-Bursa el-kâtib, Keşfî Mustafa Efendi el-kâtib, Hasan b. Ahmed er-râcil, Ali Beşe b. Ahmed er-râcil, Mehmed b. Hüseyin, Bali Beşe b. Abdullah, Müftü Salih? Beşe b. Abdullah.