İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 222 Hüküm no: 173 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varissiz olarak vefat eden Yeniçeri Murad Beşe b. Abdullah’ın Yenişehir nahiyesindeki bağ, şırahane ve evini zabteden Todori v. Dimitri’den bedelinin alınması Dergâh-ı Âlî yeniçerilerinin Birinci Ağa Bölüğü’ne mahsûs odada hâlâ odabaşı olan Mustafa Beşe nâm kimesne tarafından ikrâr-ı câ’i’z-zikre vekîl olup vekâleti Süleyman Beşe b. Hasan ve Ahmed Beşe b. Veli şehâdetleri ile şer‘an sâbite olan Mehmed Beşe b. Süleyman meclis-i şer‘de işbu hâmilü’s-sifr Todori v. Dimitri nâm zimmî muvâcehesinde bi’l-vekâle ikrâr ve takrîr-i kelâm edip oda-i mezbûre neferâtından bilâ-vâris fevt olanların beytü’l-mâlı taraf-ı Saltanat-ı Aliyye’den oda-i mezbûre mühimmâtına hâsıl kaydolunup oda-i mezbûre neferâtından olup bundan akdem bilâ-vâris fevt olan Murad Beşe b. Abdullah’ın muhallefâtından Rumeli’nde Yenişehir nâhiyesinde Büyük Kirasova nâm karyede vâki‘ iki tarafı Tarandafilo nâm zimmî mülküne ve tarafeyni tarîk-i âmma müntehî bir bâb fevkānî ve bir bâb tahtânî oda ve muhavvâtayı müştemil menzilini ve yine karye-i mezbûre sınırı dâhilinde vâki‘ bir tarafı Nikola bağı ve bir tarafı Yamalı bağı ve bir tarafı Todori tarlası ve tarîk-i âmla mahdûd mülk bağı ve bir şırahâne ve sâir esas-ı beyt ve evânî-i nühâsiyesi ba‘de-vefâtihî zâhirde vâris-i ma‘rûfu olmamağın ber-kānûn-ı şehriyârî terekesi oda-i mezbûre ahâlîsine râci‘ olmağla mezbûr Todori zikrolunan menzil ve bağı ve şırahâne ve sâir esâs-ı beyt ve evânî-i nühâsiyeyi fuzûlen zabt ve tasarruf etmekle müvekkilim mezbûr merkūm Todori’den da‘vâ ve taleb ol dahi menzil-i mezbûru müteveffâ-yı mezbûr hâl-i hayatında gāib ani’l-meclis Serdar Ali Ağa’ya ve bağ-ı mezkûr ve şırahâneyi Dimitri nâm zimmîye semen-i misilleri ile bey‘ etmekle ben dahi mezbûrândan iştirâ eyledim deyü def‘le mukābele edip müvekkilim mezbûr odabaşı def‘-i mezbûru ve mezbûr Todori zikri sebk eden esâs-ı beyt ve evânî-i nühâsiyeye vaz‘-ı yedini inkâr eylediklerinde beynlerinde münâza‘ât-ı kesîre ve muhâsamât-ı şedîde vukū‘undan sonra mezbûr Todori ba‘de’t-tahlîfi’ş-şer‘î vesâtet-i muslihîn ile da‘vâ-i mezkûreden müvekkilim mezbûr ile dokuz bin nakid akçe üzerine inşâ-i akd-i sulh eyledikde müvekkilim mezbûr dahi sulh-ı mezbûru kabûl ve bedeli olan meblağ-ı mezkûr dokuz bin akçeyi yedinden alıp kabz edip min-ba‘d müteveffâ-yı mezbûrun terekesine müte‘allika da‘vâdan müvekkilim mezbûr odabaşı mesfûr Todori’nin zimmetini ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Mustafa Bey b. ( ) Sarrâc, Mehmed Beşe b. Süleyman, Ahmed Beşe b. Veli, Mehmed Beşe b. Veli, Mehmed Beşe b. Süleyman, Ahmed Beşe b. Mehmed, Ali Beşe b. Mustafa, Ali Çelebi Yorganî, Kâtib Ahmed Çelebi, Baba Hayreddin, İvaz Beşe b. Hasan, Osman Beşe b. Şaban, Sırrı Bey b. Receb, Şaban Bey b. Receb.