İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 221 Hüküm no: 172 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Şeref mahallesi sakinlerinden Hacı Mahmud b. Hüseyin’in ölümünden kısa bir süre sonra iki oğlu da vefat ettiğinden terekesinin bu duruma göre taksimi Bundan akdem vefât eden el-Hâc Mahmud b. Hüseyin’in sulbî oğlu olup mahmiye-i İstanbul’da Molla Şeref mahallesinde sâkin iken bundan akdem vefât eden Kasım nâm sagīrin verâseti vâlidesi fahrü’l-muhadderât Hadîce Hatun bt. Mustafa’ya ve li-ümmin er karındaşı fahrü’l-a‘yân Mehmed Ağa’ya ve li-ebeveyn karındaşı Hüseyin nâm sagīre münhasıra olup kable’l-kısme sagīr-i mezbûr Hüseyin dahi fevt olup verâseti vâlidesi mezkûre Hadice’ye ve li-ümmin karındaşı mezbûr Mehmed Ağa’ya münhasıra olduğu şer‘an mütehakkık ve bi-tarîkı’ş-şer‘iye meseleleri on sekiz sehimden olup on bir sehmi mezkûre Hadice’ye ve yedi sehm mezbûr Mehmed Ağa’ya isâbet eylediği şer‘an müte‘ayyen oldukdan sonra husûs-ı âti’l-beyânı mahâllinde tahrîri için kıbel-i şer‘den Mevlânâ Mustafa Efendi irsâl olunup ol dahi mahmiye-i mezbûrede Gülcami‘i mahallesinde sâkine umdetü’l-a‘yân el-Hâc Mahmud Ağa’nın menziline varılıp zeyl-i rakīmde isimleri mastûr Müslimîn huzurlarında akd-i meclis-i şer‘ eyledikde mezkûr Mehmed Ağa kendi nefsinden asâleten ve vâlidesi mezkûre Hadîce tarafından husûs-ı âtîye vekîl olup mezbûreyi ma‘rifet-i şer‘iye ile ârifân zikrolunan Molla Şeref imâmı Mahmud Efendi b. Şaban ve Ali Dede b. Ramazan nâm kimesneler şehâdetleri ile şer‘an vekâleti sâbite oldukdan sonra vekâleten meclis-i ma‘kūd-ı mezbûrda sagīrân-ı mezkûrânın hayatlarında vasîyy-i şer‘îsi olmağla meblağ-ı âti’z-zikre vâzı‘u’l-yed olan işbu râfi‘u’l-kitâb Ali Çelebi b. Veli mahzarında ikrâr u i‘tirâf edip müteveffâ-yı mezkûr el-Hâc Mahmud’un cemî‘ terekesinden nakid beş bin on beş kıt‘a riyâlî guruş ile mezkûr Hacı Mahmud’un Kuşadası sâkinlerinden el-Hâc Ebûbekir zimmetinde cihet-i karzdan hakkı olan yüz seksen riyâlî guruş ve Ali Şahzâde Mehmed Efendi nâm kadı zimmetinde cihet-i mezbûreden hakkı olan iki yüz riyâlî guruş ve Ömer Ağa zimmetinde cihet-i mesfûreden yüz kırk riyâlî guruş Büyük Süleyman Ağa zimetinde hakkı olan elli guruş ve Halil Çelebi zimmetinde doksan bir guruş ve Hacı Seydi Ahmed zimmetinde otuz ve Kadıoğlu Abdülkerim Çelebi zimmetinde hakkı olan kırk guruş ve Pirinççizâde’de hakkı olan elli guruş ki cem‘an beş bin sekiz yüz riyâlî guruş hîn-i iktisâmda sagīrân-ı mezbûrân Kasım ve Hüseyin’in hayatlarında hisse-i irsiye-i şer‘iyelerine ta‘yîn ve tahsîs ve mezbûr Ali Çelebi tesviye-i umûrlarına vasîyy-i şer‘îleri olmağla vesâyeten meblağ-ı mezbûr beş bin on beş riyâlî guruşu kabz ve zikrolunan cem‘an yedi yüz seksen altı riyâlî guruşu ve düyûnu nâtık ve mübeyyin ve sâlifü’z-zikr medyûnların imzâ ve hâtemlerini müştemil sekiz kıt‘a temessükâtı ahz etdikden sonra meblağ-ı mezbûr beş bin on beş riyâlî guruşdan sagīrân-ı mezbûrânın hayatlarında nafaka ve kisvelerine beher şehr yüz akçeden on sekiz ayda iki yüz guruş ve müteveffâ-yı mezbûr el-Hâc Mahmud’un Doksandört Cemâ‘ati’ne mahsûs oda vakfına cihet-i deyn-i şer‘îden deyni olan elli guruş ve Ali Çelebi’ye cihet-i deyn-i şer‘îden deyni olan yüz kırk altı guruş ve Hacı Receb’e deyni olan yüz yirmi bir guruş ve Mustafa Çavuş’a deyni olan yirmi guruş ki cem‘an beş yüz otuz yedi guruş sarf ve îfâ eyledikden sonra nakid dört bin dört yüz yetmiş sekiz guruş dahi mezbûr yedinde ve zimem-i mezkûre olan mecmû‘-ı düyûn yedi yüz seksen altı riyâlî guruşu tahsîl edememeğin zikrolunan medyûnlar zimmetlerinde bâkī kalmağla nakd-i mezkûr dört bin dört yüz yetmiş sekiz guruşdan bi-hükmi’l-münâsahati’ş-şer‘iye on bir sehm hissesi mukābelesinde vâlidem mezbûre Hadice’ye iki bin yedi yüz yirmi sekiz riyâlî guruş ile sekiz yüz kırk yedi akçe ve yedi sehm hissem mukābelesinde bana bin yedi yüz otuz altı guruş ile beş yüz otuz dokuz akçe isâbet etmiş idi. Hâlâ vâlidem müvekkile-i mezbûre Hadice’ye isâbet eden meblağ-ı mesfûr iki bin yedi yüz yirmi sekiz riyâlî guruş ile sekiz yüz kırk yedi akçeyi vâlidem müvekkile-i mezbûre için vekâleten ve bana isâbet eden meblağ-ı mezbûr bin yedi yüz otuz altı guruşu ve beş yüz otuz dokuz akçeyi asâleten vasîyy-i mezkûr Ali Çelebi yedinden tamamen ahz u kabz eylediğimden sonra sâlifü’z-zikr sekiz kıt‘a temessükâtı ashâbından bir akçe ve bir habbe cem‘ ve tahsîl ve kabz etmeyip cem‘an yedi yüz seksen altı riyâlî guruş düyûn zimmetlerinde bâkīdir deyü bana teslîm eyledi, ol vechile vasîyy-i mezbûr Ali Çelebi ile üzerine kıbel-i şer‘den mansûb nâzır olan işbu el-Hâc Mahmud kıbellerinde vechen mine’l-vücûh ve sebeben mine’l-esbâb bir akçe ve bir habbe bâkī kalmadı, ba‘de’l-yevm husûs-ı mezbûra müte‘allika olan cemî‘ de‘âvî ve mutâlebât ve eymân ve muhâsamâtdan mezbûrânı asâleten ve vekâleten ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Osman Çelebi b. Abdullah meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti Şa‘bâni’l-mu‘azzam li-sene isneteyn ve seb‘în ve elf. Şuhûdü’l-hâl: es-Seyyid Mustafa Çelebi b. es-Seyyid Abdünnebi, Mehmed Ağa b. Ahmed, Mustafa Çavuş b. Hacı İbrahim, Serdar Süleyman Ağa b. Ali, Mustafa Çelebi b. Yahya bostânî, Ali Bey b. İbrahim, Piyale Bey b. Abdullah, Hacı İbrahim b. Ali, Mehmed b. Ali, Mustafa b. Abdullah.