İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 224 Hüküm no: 175 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayasofya-i Kebir Camii civarında ikamet eden Derviş Beşe b. Abdullah’ın Karabet v. Hanem’de olan alacağının tahsili Mahmiye-i İstanbul’da Ayasofya-i Kebîr Câmi‘i kurbünde sâkin Derviş Beşe b. Abdullah nâm kimesne tarafından husûs-ı âti’l-beyânı da‘vâ ve talebe ve ahz u kabza ve kendüye îsâle vekîl olup Siyavuş b. Abdullah ve Hasan Çelebi b. Mehmed şehâdetleri ile şer‘an vekâleti sâbite olan Mehmed b. Kasım nâm kimesne meclis-i şer‘de Karabet v. Hanem nâm Ermeni muvâcehesinde üzerine bi’l-vekâle da‘vâ ve takrîr-i kelâm edip müvekkilim mezbûr Derviş Beşe’nin mezbûr Karabet zimmetinde cihet-i karz-ı şer‘îden seksen beş esedî guruş hakkı olup huzûr-ı Müslimînde alâ-re’si’l-işhâd ve ikrâr dahi etmiş iken meblağ-ı mezbûr seksen beş guruşu vermede ta‘allül eder vekâletim hasebiyle meblağ-ı mezbûru taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyin beyyine taleb olundukda udûl-i ahrâr-ı Müslimînden olup mahmiye-i mezbûrede câmi‘-i mezkûr kurbünde sâkin Siyavuş b. Hudâverdi ve mahrûse-i Galata’ya tâbi‘ kasaba-i Fındıklı’da İbrahim Efendi mahallesinde sâkin Hasan Çelebi b. Muharrem nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Karabet müdde‘î-i mezbûrun müvekkil-i mezbûr Derviş Beşe’ye cihet-i mezbûreden seksen beş esedî guruş zimmetimde deynim vardır deyü bizim huzûrumuzda ikrâr ve ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinden sonra şâhidân-ı mezbûrânı mahallelerinden ta‘dîl ve tezkiye için kıbel-i şer‘den Mevlânâ Ahmed Efendi b. Hanefî irsâl olunup ol dahi mahallelerine varıp keyfiyet-i ahvâlleri suâl [ve] tefahhus olunduklarında İbrahim Efendi b. Şaban el-imâm ve Mustafa b. Mehmed ve Ahmed b. Mustafa ve Hasan b. Muharrem ve Halil Efendi b. Muharrem ve Yusuf b. Abdullah ve Mustafa b. Mehmed ve Osman b. Ali nâm kimesneler şâhidân-ı mezbûrân âdiller ve makbûlü’ş-şehâde oldukların haber verdiklerinden sonra vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Ramazan b. Ali ile meclis-i şer‘a gelip alâ-vukū‘ihî inhâ ve takrîr etdikden sonra şehâdetleri makbûle olmağın mûcebince meblağ-ı mezbûr seksen beş esedî guruş vekîl-i mezbûr Mehmed’e edâ ve teslîme mezbûr Karabet’e tenbîh birle mâ-vaka‘a bi’t-taleb ketb olundu. Fi’t-tâsi‘ min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Osman Beşe b. Abdurrahman, Mustafa b. İsa, Mehmed b. Ali, el-Hâc Veli b. Ali, Şükrullah b. Mustafa.