İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 225 Hüküm no: 176 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabaş mahallesinden Ahmed Çelebi b. Musa’nın Fatma bt. Mahmud’da olan alacağının tahsili Mahmiye-i İstanbul’da Karabaş mahallesi sâkinlerinden işbu râfi‘u’l-kitâb Ahmed Çelebi b. Musa nâm kimesne mahfil-i kazâda Fâtıma bt. Mahmud nâm hatun muvâcehesinde üzerine da‘vâ ve takrîr-i kelâm edip târih-i kitâbdan üç sene mukaddem mezbûre Fâtıma’ya her miskāli iki yüz akçeden kırk miskāl bir çift altın bileziğimi ve bin akçeye bir incili ipliğimi ve dört bin akçeye bir incili yakalığımı ve üç bin beş yüz akçeye bir dîbâ kaftanımı bey‘ ve teslîm ol dahi ber-minvâl-i muharrer iştirâ ve tesellüm edip semenlerini kabz etmeden firâr etmiş idi. Hâlâ mezbûreyi bulup ol bileziğin aynı mevcûd ise aynını değil ise kıymet-i şer‘iyesini ve mâ‘adâsının dahi sekiz bin beş yüz akçe semenlerini mezbûreden talep ederim suâl olunsun dedikde gıbbe’s-suâl mezbûre Fâtıma cevâbında fi’l-vâki‘ ber-minvâl-i muharrer eşyâ-yı mezbûreyi mezbûr yedinden iştirâ ve kabz eylediğimden sonra âhara bey‘ ile istihlâk eyledim, zikri mürûr eden eşyâyı müdde‘î-i merkūm Mehmed Çelebi yedinden iştirâ eylediğim üzere zikrolunan bileziğin kıymet-i şer‘iyesi olan sekiz bin akçe ile semenleri olan sekiz bin beş yüz akçe zimmetimde bâkīdir deyü bi-tav‘ihâ ikrâr u i‘tirâf etmeğin ikrârı mûcebince kıymet-i mezbûre ile merkūm semenleri müdde‘î-i mezbûra edâya mezbûre Fâtıma Hatun’a tenbîh birle mâ-vaka‘a bi’t-taleb ketb olundu. Fi’l-yevmi’t-tâsi‘ min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Şükrullah b. Mustafa, Mustafa b. Mahmud, Mehmed b. Ahmed, Hızır b. Fazlullah.