İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 227 Hüküm no: 179 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Mustafa’nın bütün malını üvey oğlu Mehmed Bey b. Mehmed’e hibe etmesi ve Mehmed Bey’in vefat eden annesinin mehrinden dolayı babasını ibra etmesi Mahmiye-i İstanbul’da Akseki mahallesinde sâkin Mehmed Beşe b. Mustafa nâm râcil meclis-i şer‘de üveyi oğlu işbu râfi‘u’l-kitâb Mehmed Bey b. Mehmed mahzarında tâyi‘an ikrâr ve takrîr-i kelâm edip mahalle-i mezbûrede hâlâ sâkin olduğum menzil ve içinde mevcûd olan esâs-ı beyt ve evânî-i nühâsiye ve gayr-ı nühâsiye ve bi’l-cümle kalîl ve kesîr, celîl ve hakīr ism-i mâl ıtlâk olunur her ne var ise üveyi oğlum mezbûr Mehmed Bey’in mülküdür, üzerimde lâbis olduğum esvâbımdan gayrı ism-i mâl ıtlâk olunur bir şeyim yokdur cümlesi üveyi oğlum mezbûr Mehmed’indir dedikde kelimât-ı muharreresinde mezbûr Mehmed Bey’in bi’l-muvâcehe [tasdîk] eyledikden sonra mezbûr Mehmed Bey dahi üveyi babası merkūm Mehmed Beşe muvâcehesinde ikrâr edip mezbûr Mehmed Beşe’nin zevcesi iken vefât eden vâlidemin mezbûrun zimmetinde olan altı bin akçe mehrinden gayrı terekesi olmamağın zikrolunan mehr-i mezbûrdan benim hisseme â’id olan dört bin beş yüz akçeden üveyi babam mezbûr Mehmed Beşe’nin zimmetini ibrâ-i âm ile ibrâ eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâmin [min]-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Halil Çelebi b. İbrahim, Ali Dede b. Mehmed, Halil Dede b. Kâmil, Ahmed Bey b. Kâmil, Mehmed Beşe b. Durmuş, Ali b. Hüseyin, Yusuf Efendi el-imâm, Ömer Çelebi dâmad-ı imâm.