İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 226 Hüküm no: 178 Orijinal metin no: [21b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Debbağyunus mahallesinden Hacı Mansur b. Yunus’un borcunun terekesinden ödenmesi Mahmiye-i İstanbul’da Debbağyunus mahallesinde sâkin iken bundan akdem fevt olan el-Hâc Mansur b. Yunus nâm kimesnenin sulbiye sagīre kızı Fâtıma’nın tesviye-i umûruna kıbel-i şer‘den mansûb vasîsi olan li-ebn karındaşı Mansur nâm kimesne meclis-i şer‘de üzerine kıbel-i şer‘den nâzır nasb olan Nasıruddin b. Yunus tarafından husûs-ı âti’z-zikre vekîl-i şer‘îsi olan Ahmed Efendi b. Mehmed mahzarında takrîr-i kelâm edip mezbûr Nasıruddin’in müteveffâ-yı mezbûr zimmetinde karz-ı şer‘îden ve menzil semeninden ba‘de küllî hesâb on beş bin akçe hakkı olup mezbûr el-Hâc Mansur’un vefâtından sonra huzûr-ı hâkimü’ş-şer‘de muvâcehemde şuhûd-ı udûlle isbât edip meblağ-ı mezbûr on beş bin akçe ile sagīre-i mezbûreye babası müteveffâ-yı mezbûrdan intikāl eden mâlından ba‘de ihrâci’l-mesârif yüz elli dokuz buçuk esedî guruşu bi’l-vesâye kabz eyledim dedikde vâki‘u’l-hâl vekîl-i mezbûr talebi ile ketb olundu. Fi’s-sânî min-Şa‘bâni’l-mu‘azzam li-sene isneteyn ve seb‘în ve elf. Şuhûdü’l-hâl: Abdullah b. ( ) el-imâm, Mehmed Çavuş b. ( ), el-Hâc Mehmed, Şükrullah b. Mustafa