İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 228 Hüküm no: 181 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli Vilayeti Opar kasabasındaki evini, hayvanlarını, bağını ve diğer mülklerini Todo v. Kino’nun gasbettiğini iddia eden Tanaş v. Todori’nin iddiasını ispat edememesi Çoban? tâifesinden Tanaş v. Todori nâm zimmî mahfil-i kazâda işbu bâ‘isü’s-sifr Todo v. Kino nâm zimmî mahzarında üzerine da‘vâ ve takrîr-i kelâm edip mezbûr Todo vilâyet-i Rumeli’nde Opar nâm kasabada vâki‘ bir tarafı Miho mülküne ve bir tarafı Tolo mülküne ve iki tarafı tarîk-i âmma müntehî büyût-ı adîdeyi müştemil menzilimi ve içinde mevcûd iki kazgan ve on dört fıçı ve yirmi re’s koyun ve bir çift kara sığır öküzlerini ve bir re’s katırımı ve Gülara demekle ma‘rûf mevzi‘de vâki‘ iki kıt‘a bağımı ve on kıt‘a tarlalarımı üç seneden beri zabt ve tasarruf ve ma‘lûmü’l-mikdâr mahsûlâtını kabz etmişdir, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyin beyyine taleb olundukda ityân-ı beyyineden ızhâr-ı acz edip istihlâf etmeğin fi’l-vâki‘ mezbûr Tanaş’ın kasaba-i mezbûrede vâki‘ zikri mürûr eden emlâkini zabt ve tasarruf ve kabz etmediğine yemîn teklîf olundukda ol dahi alâ-hasebi’l-mesûl yemîn billâhi’llezi enzele’l-İncîle alâ-İsa aleyhi’s-selâm etmeğin mezbûr Tanaş bî-vech muârazadan men‘ birle mâ-vaka‘a bi’t-taleb ketb olundu. Fi’l-yevmi’t-tâsi‘ min-Şa‘bâni’l-mu‘azzam sene 1072 Şuhûdü’l-hâl: Mustafa b. Abdullah, Abdi Çelebi b. Hüseyin, Şükrullah b. Mustafa, Mehmed b. Ramazan.