İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 228 Hüküm no: 182 Orijinal metin no: [22a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Ahmed’in Mustafa Çelebi b. Osman’a olan borcunun vadesinin dolması Dârü’l-hilâfeti’l-aliyye Kostantıniyyeti’l-mahmiyede tüccâr tâifesinden Mehmed Bey b. Ahmed meclis-i şer‘-i şerîf-i enver ve mahfil-i dîn-i münîf-i ezherde Mustafa Çelebi b. Osman mahzarında takrîr-i da‘vâ edip târih-i kitâb senesinden beş ay mukaddem semenleri sene-i mezbûre Şa‘bânı’nın on üçüncü gününe mü’eccel olmak üzere her biri beşer riyâlî guruş olmak üzere mezbûr Mustafa Çelebi silk-i mülkümde olan beş Şam alacasını iştirâ ve kabz edip el-yevm mezbûr Şa‘bân’ın on üçüncü günü yevm-i ahad olup ecel hulûl etmekle meblağ-ı mezbûru taleb ederin, suâl olunsun dedikde gıbbe’s-suâl mezbûr Mustafa Çelebi cevâbında fi’l-vâki‘ târih-i kitâbdan beş ay mukaddem zikrolunan alacaları semenleri yevm-i mezbûra mü’eccel olmak üzere her biri beşer riyâlî guruşa mezbûrdan iştirâ ve kabz eyledim idi, lâkin hilâl-i Şa‘bân erbi‘a gecesi görülmekde ecel-i mezbûr el-yevm hulûl etmemişdir deyü hulûlünü inkâr eyledikde müdde‘î-i mezbûrdan müdde‘âsını mübeyyin beyyine taleb olundukda udûl-i ricâl-i Müslimînden olup mahmiye-i mezbûrede Silivrikapısı kurbünde İbrahim Paşa mahallesinde sâkin Ali Bey b. Mehmed ve Çukurhamam kurbünde sâkin Muharrem Beşe b. Hüseyin ve medîne-i Ebî Eyyûb Ensârî mahallâtından Defterdâr Mahmud Efendi mahallesi sükkânından Kenan b. Abdullah ve Kayıkçı Hüseyin Beşe b. Mehmed ve Karadeniz Ereğlisi’nden Ali b. Veli nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında mezbûr Ali Bey evvelâ fi’l-vâki‘ târih-i kitâbdan on üç gün mukaddem sâlise gecesi Silivrikapısı hâricinde kubeyl-i mağribde havada gaym olduğu hâlde re’yü’l-ayn hilâl-i Şa‘bânı gördüm ve mezbûr Muharrem Beşe dahi fi’l-vâki‘ târih-i kitâbdan on üç gün mukaddem sâlise gecesi kubeyl-i mağribde Sultan Mehmed Han Câmi‘-i şerîfinin şimâl tarafında havada gaym olduğu hâlde re’yü’l-ayn hilâl-i Şa‘bânı gördüm ve mezbûrân Kenan ve Hüseyin Beşe dahi târih-i kitâbdan on üç [gün] mukaddem sâlise gecesi ba‘de’l-mağrib zikrolunan Defterdâr Mahmud Efendi mahallesinde hilâl-i Şa‘bânı havada gaym olduğu hâlde re’yü’l-ayn gördük ve mezbûr Ali dahi fi’l-vâki‘ târih-i kitâbdan on üç gün mukaddem sâlise gecesi kubeyl-i mağribde Karadeniz Ereğlisi burnunda havada gaym olduğu hâlde re’yü’l-ayn hilâl-i Şa‘bânı gördüm deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’iti’’l-kabûl şehâdetleri makbûle olmağın hilâl-i Şa‘bân sâliseden olup ecel-i mezbûr hulûl eylediğine ba‘de’l-hüküm mâ-vaka‘a bi’t-taleb ketb olundu. Fi’l-yevmi’s-sâlis aşer min-Şa‘bâni’l-mu‘azzam sene isnâ ve seb‘în ve elf Şuhûdü’l-hâl: Mefharu’l-müderrisîn el-Hâc Mustafa Efendi, Fahrü’l-müderrisîn Kadri Efendi el-Bursa, Keşfî Mustafa Efendi b. Muharrem, Mehmed Efendi b. Abdülkadir, Muharrirü’l-hurûf Ahmed Bakizâde.