İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 230 Hüküm no: 184 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demirtaş mahallesinden İbrahim Beşe b. Murad’ın başka bir yere gitmesi üzerin Mehmet b. Ali ile karı-koca hayatı yaşayan karısı Sâliha bt. Mustafa’nın durumu Mahmiye-i İstanbul’da Demirtaş mahallesinde sâkin işbu bâ‘isü’l-kitâb İbrahim Beşe b. Murad nâm kimesne mahfil-i kazâda Mehmed b. Ali ile zevcesi Sâliha bt. Mustafa mahzarlarında üzerlerine da‘vâ ve takrîr-i kelâm edip merkūme Sâliha târih-i kitâbdan sekiz sene mukaddem sekiz yüz akçe mehr-i mü’eccel üzere nefsini bana tezvîc ben dahi tezevvüc ve kabûl edip taht-ı nikâhımda iken ben âhar diyâra gitmekle merkūm Mehmed ile hâlâ zevciyet üzere mu‘âşeret ederler suâl olunmak matlûbumdur dedikde gıbbe’s-suâl merkūm Mehmed cevâbında mezbûre Sâliha târih-i kitâbdan iki ay mukaddem şâhideyn huzûrunda sekiz yüz akçe mehr-i mü’eccel üzerine nefsini bana tezvîc edip ben dahi tezevvüc ve kabûl etmekle zevce-i gayr-ı medhûlün-bihâm olmuşdur müdde‘î-i merkūm İbrahim Beşe’nin zevcesi olup el-ân zevciyet beynlerinde kāime olduğu ma‘lûmum değildir deyü inkâr edicek müdde‘î-i mezbûr İbrahim Beşe’den müdde‘âsını mübeyyin beyyine taleb olundukda udûl-i Müslimînden olup mahalle-i mezbûre sükkânından Ali Beşe b. Mehmed er-râcil ve Mismârcı Süleyman b. Said nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûre Sâliha târih-i kitâbdan sekiz sene mukaddem mezbûr İbrahim Beşe’ye sekiz yüz akçe mehr-i mü’eccel üzerine nefsini biz[im] huzûrumuzda tezvîc edip ol dahi tezevvüc ve kabûl eyledi idi, biz bu husûsa şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra mezbûre Sâliha’yı bir tarîk ile târih-i kitâb gelince tatlîk etmediğine mezbûr İbrahim Beşe’ye yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince ba‘de’l-hüküm mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Şa‘bâni’l-mu‘azzam li-sene isneteyn ve seb‘în ve elf. Şuhûdü’l-hâl: es-Sâbıkūn