İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 231 Hüküm no: 185 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimar Hayreddin mahallesinden Hacı Abdi b. Receb’in mirası taksim edilmeden küçük oğlu da vefat ettiğinden mirasının buna göre taksim edilmesi Mahmiye-i İstanbul’da Mimar Hayreddin mahallesinde sâkin iken bundan akdem vefât eden el-Hâc Abdi b. Receb’in verâseti zevce-i hâmili Âişe Hatun bt. Musa’ya ve sulbî sagīr oğlu Ahmed ile hamline münhasıra olup kable’l-kısme mezbûr Ahmed dahi vefât edip verâseti vâlidesi mezbûre Âişe’ye ve li-ebeveyn ammi oğlu İbrahim b. el-Hâc Abdullah’a münhasıra olduğu ve tashîh-i meseleleri kırk sehimden olup sihâm-ı mezbûreden altı sehmi zevcinden ve yedi sehmi oğlu müteveffâ-yı sânîden mezbûre Âişe’ye ve yirmi bir sehmi haml-i mezbûra ve on dört sehmi müteveffâ-yı sânî Ahmed’den mezbûr İbrahim’e intikāl eylediği şer‘an zâhir oldukdan sonra mezbûr İbrahim meclis-i şer‘-i hatîrde müteveffâ-yı mezbûrun cümle terekesine vaz‘-ı yedi sâbite olan işbu râfi‘atü’-kitâb mezbûre Âişe tarafından husûs-ı câ’i’z-zikre vekîl olup mezbûrenin zâtını ma‘rifet-i şer‘iye ile ârifân olup mahmiye-i mezbûrede Kebeciler Hânı’nda sâkin el-Hâc Süleyman b. Ebûbekir ve Receb Çelebi b. Mustafa şehâdetleri ile şer‘an vekâleti sâbite olan Mehmed Çelebi b. Ali nâm kimesne mahzarında ikrâr ve takrîr-i kelâm edip mezbûre Âişe oğlu müteveffâ-yı sânî mezbûr Ahmed’in fevtinden sonra yedi ay mürûrunda bir oğlan doğurmağla mezbûr Ahmed’in babasından intikāl eden yirmi bir sehm hissesinden haml-i mezbûr vâris olmayıp mezbûr Ahmed’in hissesinin on dört sehmi bana intikāl eylemiş idi, el-hâletü hâzihî müteveffâ-yı sânî Ahmed’in akār ve menkūl ve esâs-ı beyt ve evânî-i nühâsiye ve gayr-ı nühâsiye ve bi’l-cümle kalîl ve kesîr ve celîl ve hakīr muhallefâtından bi-tarîkı’l-münâsahati’l-mezkûre on dört sehm hisse-i şer‘iyeden şerâ’it-i sulhü hâvî tehârüc-i şer‘î tarîki üzere vekîl-i mezbûr benimle kırk bin akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûru vekîl-i mezbûr Mehmed Çelebi yedinden tamamen alıp kabz eyledim ba‘de’l-yevm tereke-i müteveffâ-yı mezbûra müte‘allika da‘vâ ve nizâ‘ ve alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: el-Hâc Hüseyin b. Sefer, Receb Çelebi b. Mustafa, el-Hâc Süleyman b. Ebîbekir, Muharrem b. Mehmed, es-Seyyid Şaban b. es-Seyyid Mahmud, Hasan Efendi b. Osman, Ahmed b. Sinan, Küçük Süleyman b. Ramazan, İvaz b. Ramazan, İvaz b. Hasan, Murtaza b. Ali, Osman b. Abdullah.