İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 242 Hüküm no: 201 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hersek sancağında Blagay kazasına bağlı Orah köyünde babası Hudaverdi ve kardeşi Murteza’nın vefatıyla Mustafa’ya kalan çiftlik ve tarlaların satılması Vilâyet-i Rumeli’nde Hersek sancağında Blagay kazâsına tâbi‘ Orah? nâm karyede sâkin iken bundan akdem vefât eden Hudâverdi’nin verâseti sulbî kebîr oğulları Murtaza ve Mustafa’ya münhasıra olup kable’l-kısme mezbûr Mustafa dahi vefât edip verâseti ancak li-ebeveyn karındaşı mezbûr Murtaza’ya münhasıra olduğu şer‘an zâhir ve müte‘ayyen oldukdan sonra merkūm Murtaza meclis-i şer‘de Devletlüzâde demekle şehîr işbu bâ‘isü’l-kitâb Mehmed Çelebi b. el-Hâc Ahmed mahzarında ikrâr ve takrîr-i kelâm edip karye-i mezbûrede vâki‘ bir tarafı Ali Bey nâm sipâhi mülkü ve bir tarafı el-Hâc Selim Efendi mülkü ve bir tarafı bayır ve bir tarafı tarîk-i âmma müntehî tahtânî bir oda ve kayganlı? bir kule ve muhavvâta ve bir samanlık ve zât-ı eşcâr-ı müsmire ve gayr-ı müsmire bahçe ve harman yerini müştemil çiftlik ta‘bîr olunur mülk menzilimi mezbûr Mehmed Çelebi’ye bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfik on beş bin nakd-i râyic fi’l-vakt akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ol dahi iştirâ ve kabûl eyledikden sonra zikrolunan Blagay Kal‘ası mustahfızlarına mahsûs tımar arâzîsinden olup karye-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd tarlalar babamız müteveffâ-yı mezbûrun tasarrufunda olup ba‘de vefâtihî ber-vech-i iştirâk-i seviy intikāl-i âdî ile bana ve li-ebeveyn karındaşım mezbûr Mustafa’ya intikāl edip mezbûr dahi bilâ-veled fevt olup hakk-ı tapu benim olmağıyla sahib-i arzdan tapu-yı misli ile alıp mutasarrıf olduğum nısf-ı âharı iki bin beş yüz akçe bedel mukābelesinde Salih nâm kimesneden mezbûr ile ber-vech-iştirâk-i seviy tefevvüz eylediğimiz tarlaları ma‘rifet-i sahib-i arz ile on iki bin beş yüz akçe bedel mukābelesinde merkūm Mehmed Çelebi’ye ferâğ ve tefvîz ol dahi ber-minvâl-i muharrer tefevvüz ve kabûl eyledikden sonra semen-i mezkûr on beş bin akçe ile bedel-i mezkûr on iki bin beş yüz akçeyi mersûm Mehmed Çelebi yedinden tamamen ahz u kabz edip çiftlik ile tarlaları mahâllinde kabz ve tasarrufa mezbûr Mehmed Çelebi’yi taslît eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Hasan Efendi b. Nasuh el-imâm, Süleyman Bey b. ( ) el-cündî, Osman Bey b. Ahmed el-cündî, Durak Bey b. Rıdvan el-cündî, Süleyman Beşe b. Ali, Salih Odabaşı b. Ömer, Ahmed Bey b. ( ) el-cündî, Şaban Beşe b. ( ), Ömer Bey b. ( ), diğer Şaban Bey b. ( ) el-cündî, Durak Bey b. ( ) el-cündî, Mehmed b. Ramazan.