İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 241 Hüküm no: 200 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Çelebi b. Ali’nin Kasım Ağa mahallesinde bulunan evini Mehmed Efendi b. Hüseyin’e satması Dârü’l-hilâfeti’l-aliyye Kostantıniyyeti’l-mahmiyede Edirnekapısı kurbünde Kasım Ağa mahallesinde sâkin İsmail Çelebi b. Ali meclis-i şer‘-i hatîr-i lâzımü’t-tevkīrde işbu sahibü’l-kitâb mefharu’s-sâdât Mehmed Efendi b. es-Seyyid Hüseyin muvâcehesinde ikrâr-ı tâm ve takrîr-i kelâm edip silk-i mülk-i sahîhimde münselik olup mahalle-i mezbûrede vâki‘ bir tarafı Çukurbostan ve bir tarafı Aynî nâm hatun mülkü ve bir tarafı Kasım Ağa’nın evlâdına meşrût olan menzil ve bir tarafı tarîk-i hâs ile mahdûd dâhiliyesinde iki bâb fevkānî oda ve tahta-pûş ve kilârı ve matbahı ve bi’r-i mâ’î ve kenîfi ve hâriciyesinde iki bâb fevkānî oda ve altında ahır ve kenîfi müştemil mülk menzilimi cümle tevâbi‘ ve levâhıkı ve kâffe-i hukūk [ve] merâfıkı ile merkūm es-Seyyid Mehmed Efendi’ye elli üç bin fıddî râyic fi’l-vakt akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm ol dahi minvâl-i muharrer üzere iştirâ ve tesellüm ve kabûl ve kabz eyledikden sonra semeni olan meblağ-ı mezbûr elli üç bin üç yüz akçeyi müşteri-i mezbûr yedinden bi’t-tamam ahz u kabz eyledim ba‘de’l-yevm menzil-i mahdûd-ı mezbûr mesfûr es-Seyyid Mehmed Efendi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Şa‘bâni’l-mu‘azzam li-sene isneteyn ve seb‘în ve elf. Şuhûdü’l-hâl: Mehmed Efendi b. Halil el-imâm, es-Seyyid Cafer Efendi b. Abdülkerim el-müezzin, İbrahim Efendi b. Mahmud el-imâm, el-Hâc Receb Halîfe b. Mehmed el-müezzin, Mehmed b. Süleyman, İbrahim Çelebi b. Himmet, Abdurrahman Çelebi b. Mehmed, es-Seyyid Mehmed Çelebi b. es-Seyyid Cafer, Mehmed b. el-Hâc Hasan, es-Seyyid Hasan b. Mustafa, Mehmed Beşe zağracı, Mustafa b. Cafer.