İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 243 Hüküm no: 203 Orijinal metin no: [24b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Hırsoven’in hizmetçilerinin Ali Paşa-yı Atik mahallesinden Hacı Hüseyin. b. Hamza’nın parasını çalmaları üzerine ikame edilen dava ve tarafların birbirini ibra etmesi Mahmiye-i İstanbul’da Vâlide Hamamı kurbünde Ali Paşa-yı Atîk mahallesi ahâlîsinden el-Hâc Hüseyin b. Hamza nâm kimesne meclis-i şer‘de bâ‘isü’l-vesîka Yamandi v. Hırsoven nâm zimmî tarafından husûs-ı câ’îye vekîl olup müezzin el-Hâc Mehmed b. Ali ve Şaban Beşe b. Abdullah nâm kimesneler şehâdetleri ile vekâleti sâbite olan Mihail v. Yani nâm zimmî muvâcehesinde tav‘an takrîr-i kelâm edip apardıcı tâifesinden gāibûn ani’l-meclis isimleri ma‘lûmum olmayan kimesneler abd-i memlûküm gāib ani’l-meclis Hasan b. Abdullah’ı apardıklarında mezbûr Hasan dahi târih-i kitâbdan otuz dört gün mukaddem Cum‘a günü kable’l-asr mukaffel dolabım içinden altmış bin akçemi hufyeten ahz eyledikden sonra müvekkil-i mezbûrun hizmetkârları İstefan ve Semo ile âşinâ olmağla mezbûr Hüseyin’i menziline götürdüklerinden sonra ol kūtumı mezbûrun menzilinde bulup yedinde mevcûd bulunan altı bin akçemi kabz edip meblağ-ı mâ‘adâ kırk dört bin akçemi dahi müvekkil-i mezbûrdan da‘vâ ve taleb eylediğimde mezbûr Yamandi dahi inkâr edip ben dahi müdde‘âmı isbât sadedinde iken beynimizde münâza‘ât-ı kesîre ve muhâsamât-ı şedîde vâkı‘a olmuş idi, vesâtet-i muslihîn ile meblağ-ı mâ‘adâ kırk dört bin akçe da‘vâsından an-inkâr vekîl-i mezbûr Mihail zimmî ile yirmi üç bin akçe üzerine sulh olup ol dahi ba‘de’l-kabûl bedel-i sulh olan meblağ-ı mezbûr yirmi üç bin akçemi yedinden kabz edip müvekkil-i mezbûr Yamandi ile …? husûs-ı mezbûra müte‘allika de‘âvî ve mutâlebât ve eymân ve muhâsamâtdan ibrâ-i âm ile ibrâ ve ıskāt eyledim min-ba‘d benden veyâ vekîlimden husûs-ı mezbûra müte‘allika da‘vâ sudûr ederse lede’l-hükkâmi’l-kirâm makbûle ve mesmû‘a olmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâdis aşer min-Şa‘bâni’l-mu‘azzam sene 1072 Şuhûdü’l-hâl: Hüseyin Efendi el-Burûsî el-kâtib, Mehmed Çelebi b. Ali, Mustafa Çelebi b. Mehmed, Mustafa Çelebi b. İsa el-muhzır, Ahmed Çelebi b. Mahmud kethudâ-i muhzırîn, Şükrullah b. Mustafa, Ahmed Çelebi b. Mahmud.