İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 244 Hüküm no: 204 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasımpaşa’da sakin Abdülkerim Beşe b. Mustafa’nın Vasil v. Avanis ile Arslan v. Mihail’in kölesini kandırıp sattığı iddiasından vazgeçmesi Medîne-i Galata a‘mâlinden kasaba-i Kasımpaşa’da Sakızağacı kurbünde sâkin Abdülkerim Beşe b. Mustafa nâm râcil meclis-i şer‘-i hatîrde bâ‘isü’l-vesîka Vasil v. Avanis ile Arslan v. Mihail nâm zimmîler muvâcehelerinde tav‘an ikrâr ve takrîr-i kelâm edip mezbûrân târih-i kitâbdan yetmiş üç gün mukaddem gāib ani’l-meclis Rusiyyü’l-asl Dilaver b. Abdullah nâm abd-i memlûkümü ayardıp semenini bey‘ ile istihlâk eyledi deyü kıymet-i şer‘iyesini mezbûrândan da‘vâ ve taleb eylediğimde mezbûrân inkâr etmekle beynimizde münâza‘ât-ı kesîre vâkı‘a olmuş idi, el-hâletü hâzihî yemîn dahi taleb etmeyip da‘vâ-yı mezbûreden merkūmân Vasil ile Arslan’ı ibrâ-i âmm-ı kātı‘u’n-nizâ‘la ibrâ ve ıskāt eyledim, min-ba‘d benden veyâ vekîlimden mârrü’z-zikr köleye müte‘allika da‘vâ sudûr ederse lede’l-hükkâmi’l-kirâm makbûle ve mesmû‘a olmasın dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: es-Sâbıkūn