Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 86 Hüküm no: 68 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi’nin bağını sattığı Mahmiye-i İstanbul’da Hoca Hayreddin Mahallesi’nde sâkin Ali Çelebi b. el-Hâc Mustafa nâm kimesne meclis-i şer‘-i hatîr-i lâzımü’t-tevkīrde mahrûse-i Üsküdar kazâsı muzâfâtından Küçük Maltepe nâm karyeden işbu bâ‘isü’s-sifr Yamandi v. İstimad nâm zimmî muvâcehesinde ikrâr-ı tâm ve takrîr-i kelâm edip karye-i mezbûrede vâki‘ bir tarafı Himmet Beşe bağı ve bir tarafı Receb Çelebi bağı ve bir tarafı Damsız nâm zimmî bağı ve bir tarafı tarîk-i âm ile mahdûd ve mümtâz tahmînen iki dönüm mülk bağımı mezbûr Yamandi’ye fıddî râyic fi’l-vakt dört bin yedi yüz akçeye bey‘-i bâtt-ı sahîh-i şer‘î ile bey‘ ol dahi iştirâ ve kabûl eyledikden sonra semen-i mezbûr dört bin yedi yüz akçeyi yedinden bi’t-tamam ve’l-kemâ[l] ahz u kabz eyledim, ba‘de’l-yevm zikr olunan bağ mülk-i müşterâsı olup keyfe mâ yeşâ’ ve hasbe-mâ yürîd mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Şa‘bâni’l-mu‘azzam li-sene selâse ve sittin ve elf. Şuhûdü’l-hâl: Himmet Beşe b. Mehmed, Veli Beşe b. Mahmud, Ahmed Beşe b. el-Hâc Hasan, Yusuf b. Hamza, Hasan b. Hamza.