İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 261 Hüküm no: 223 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gelibolu’nun Hızır İlyas mahallesinden Yorgi v. Mavroni’nin evini Kiryako v. Likori’ye satması Medîne-i Gelibolu mahallâtından Hızır İlyas mahallesinde sâkin Yorgi v. Mavroni nâm zimmî meclis-i şer‘-i hatîrde işbu bâ‘isü’s-sifr Kiryako v. Likori nâm zimmî muvâcehesinde takrîr-i kelâm edip mahalle-i mezbûrede vâki‘ bir tarafdan Sonata nâm zimmî mülküne ve bir tarafdan Manol nâm zimmî mülküne ve bir tarafdan Yani v. Zaharya nâm zimmî mülküne ve bir tarafdan tarîk-i âmma müntehî bir bâb tahtânî beyti ve kenîfi ve bir enâr ağacını müştemil mülk menzilimi mezbûr Kiryako’ya üç bin beş yüz akçeye bey‘-ı bâtt-ı sahîh-i şer‘î ile bey‘ ve teslîm edip ol dahi vech-i muharrer üzere iştirâ ve kabûl eyledikden sonra meblağ-ı mezbûr üç bin beş yüz akçeyi mezbûr Kiryako yedinden tamamen alıp kabz edip menzil-i mahdûd-ı mezbûru mahâllinde ahz u kabza mezbûr Kiryako’yu taslît eyledim, ba‘de’l-yevm menzil-i mahdûd-ı mezbûr merkūm Kiryako’nun mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: Abdülbaki Reis b. Mustafa, Ali Reis b. Mehmed, Hasan Çelebi b. Halil, Halil Çelebi b. Hasan Efendi, Süleyman Beşe, Mehmed Çelebi b. Seyyid Mehmed Efendi.