İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 261 Hüküm no: 224 Orijinal metin no: [27b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terkos nahiyesinden Ömer b. Abdi’nin evini Sinan b. Mehmed’e satması Havâss-ı Aliyye kazâsı muzâfâtından Terkos nâhiyesine tâbi‘ Yayla nâm karye sükkânından Ömer b. Abdi nâm kimesne meclis-i şer‘de işbu râfi‘u’l-kitâb Sinan b. Mehmed nâm kimesne mahzarında ikrâr ve takrîr-i kelâm edip karye-i mezbûrede vâki‘ bir tarafdan Mustafa b. Hasan mülküne ve bir tarafdan Hoca İskender b. Davud mülküne ve bir tarafdan Ahmed b. Mahmud mülküne ve bir tarafdan tarîk-i âmma müntehî bir bâb kiremid pûşîde süflî çatma beyti ve bir ahırı müştemil mülk-i müşterâm olan menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr Sinan’a râyic fi’l-vakt dört bin akçeye tarafeynden îcâb ve kabûlü hâvî bey‘-ı bâtt-ı sahîh ile bey‘ ve mezbûr Sinan dahi minvâl-i muharrer üzere iştirâ eyledikden sonra semeni olan meblağ-ı mezbûru tamamen yedinden alıp kabz edip bey‘-ı mezbûru mahâllinde kabz ve tasarrufa mezbûr Sinan’ı taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’r-râbi‘ ve’l-işrîn min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: İskender b. Hacı, Davud b. Kasım, Süleyman b. İsa, Ömer b. Süleyman, Ahmed b. Süleyman, Sinan b. İsa, Hasan b. Mustafa, Ahmed b. Mahmud, Ahmed b. Şişko Mehmed.