İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 264 Hüküm no: 229 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin Macar asıllı kölesi Hasan b. Abdülmennan’ı azat ettiği Itk-nâme. Hâlâ atebe-i aliyyede lâ-zâlet meşhûnetü bi’l-inâyâti’s-sübhâniyeden reisülküttâb olan iftihâru a‘rifü zevi’l-avârif usvetü ashâbi’l-kemâlât ve’l-ma‘ârif sahibü’s-sa‘âdeti ve’l-iclâl sahibü ezyâli’l-mecdi ve’l-akyâl zü’l-kadri’r-refî‘i ve’l-cân el-menba‘u’l-câmi‘i’l-mekârim ve’l-meâli merci‘u’l-ekâbir ve’l-e‘âlî el-mahfûf bi-sunûf-i avâtıfı’l-meliki’s-samed Şâmîzâde el-Hâc Mehmed Efendi hazretleri necl-i mükerremleri Mustafa Efendi hazretleri taraf-ı bâhir-i eşreflerinden i‘tâk-ı âti’z-zikri ikrâra vekîl olup es-Seyyid Mehmed Efendi b. es-Seyyid Ali ve Mustafa Çavuş b. Receb şehâdetleri ile şer‘an vekâleti sâbite olan fahrü’l-cüyûş es-Seyyid Mehmed Çavuş b. es-Seyyid Nasreddin meclis-i şer‘-i hatîr-i lâzımü’t-tevkīrde bi’l-vekâle ikrâr ve takrîr-i kelâm edip müvekkilim müşârün-ileyh Mustafa Efendi rıkkını kendülere mu‘terif olan orta boylu kara gözlü açık kaşlı Macariyyü’l-asl Hasan b. Abdülmennan nâm abd-i memlûkünü niyet-i hâlise-i vâfiye ve taviyyet-i tayyibe-i sâfiye ile hasbeten lillahi’l-aliyyü’l-azîm ve taleben li-merzâti’r-rabbi’r-rahîm tahrîr ve i‘tâk ve silk-i ahrâr-ı asliyyîne idrâc ve ilhâk edip min-ba‘d mezbûr Hasan sâir ahrâr gibi hür olup üzerinde [velâdan] gayrı hakkım bakī kalmadı dedi dedikde mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Fahrü’l-müderrisîn Mustafa Efendi, İbrahim Ağa b. Mehmed Efendi, Şahin Ağa b. Abdülmennan, Receb b. el-cündî, Sefer Bey b. Şaban, Mehmed Ağa b. Müstedam.