İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 264 Hüküm no: 228 Orijinal metin no: [28a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Habib Bey b. Şaban başka bir yere gittiğinde Ahmed b. Abdullah ile evlenen Sâliha bt. Yahya’ın evliliğinin sona erdirilmesi Mahmiye-i İstanbul’da Avratpazarı kurbünde sâkin hâfızü’l-vesîka Habib Bey b. Şaban nâm kimesne meclis-i şer‘de Ahmed b. Abdullah mahzarında üzerine da‘vâ ve takrîr-i kelâm edip târih-i kitâbdan beş sene mukaddem işbu hâzıra Sâliha bt. Yahya nâm hatunu Harâççı Cami‘i mahallesinde şâhideyn huzûrunda beş yüz akçe mehr-i mü’eccel ile tezevvüc ve duhûl edip zevcem iken âhar diyâra gitdikden sonra mezbûr Ahmed’e nefsini yirmi akçe mehr-i mü’eccel ile tezvîc ol dahi tezevvüc ve duhûl edip yedinde bulmağla beynleri tefrîk olunmak taleb ederim dedikde gıbbe’s-suâl cevâbında fi’l-vâki‘ mezbûre Sâliha’yı bin akçe mehr-i mü’eccel ile tezevvüc ve duhûl edip mezbûr Habib’in zevcesi olduğu ma‘lûmum değildir deyü inkâr edicek, müdde‘î-i mezbûr Habib’den müdde‘âsı için beyyine taleb olundukda udûl-ı Müslimînden İmâm Mehmed Efendi b. ( ) ile Taşçı Ahmed b. Malkoç nâm kimesneler li-ecli’ş-şehâde meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ mezbûr Habib ve mezbûre Sâliha Hatun’u târih-i mezbûrda huzûrumuzda beş yüz akçe mehr-i mü’eccel ile tezevvüc, ol dahi mezbûra nefsini tezvîc eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de riâyeti şerâ’iti’’l-kabûl şehâdetleri makbûle olmağın mezbûr Habib mezbûre Sâliha Hatun’u tatlîk eylemediğine ba‘de’t-tahlîf yemîn billâhi’l-aliyyü’l-azîm eyledikden sonra mezbûr Ahmed ile mezbûre Sâliha Hatun’un beynleri tefrîk ve mehr-i müsemmâ-yı mezbûru tecâvüz eylemeyen mehr-i mislini mezbûre Sâliha Hatun’a teslîme mezbûr Ahmed’e tenbîh olundukdan sonra kable inkızâ’i’l-iddet mezbûre ile ezvâc mu‘âmelesi etmemeğe mezbûr Habib’e dahi tenbîh olunup mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: Hüseyin Efendi el-Burûsî, Keşfî Mustafa Efendi el-kâtib, Ahmed Efendi el-kâtib, Ahmed Çelebi b. Mahmud, Şükrullah b. Mustafa, Abdi Çelebi b. Hüseyin.