İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 265 Hüküm no: 231 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Paşa’nın Çatalca’daki menzil, çiftlik ve tarlalarınıı Bursevî Hüseyin Efendi’ye satıldığı Mübâya‘a-i menzil ve çiftlik ve tarlalar. Husûs-ı âti’l-beyânın mahâllinde tahrîri iltimâs olunmağın savb-ı şer‘den mevlânâ Bursevî Hüseyin Efendi irsâl olunup ol dahi mahmiye-i İstanbul’da Çerâğī Hamza mahallesinde a‘lemü’l-ulemâi’l-izâm efdalü’l-fudalâi’l-fihâm yenbû‘u’l-fezâyil ve’l-meâli metbû‘i’l-efâzıl ve’l-e‘âlî eş-Şeyh Mehmed Efendi menzil-i âlîlerine zeyl-i kitâbda isimleri mastûr Müslimîn huzûrunda akd eylediği meclis-i şer‘de mûmâ-ileyh eş-Şeyh Mehmed Efendi sâbıkā Mısır Beylerbeyisi olan düstûr-ı mükerrem müşîr-i mufahham vezîr-i muhterem es-Seyyid Mehmed Paşa taraf-ı âlîlerinden ikrâr-ı âti’z-zikri tasdîke vekîl olup fahrü’l-müderrisîni’l-kirâm Abdullah Efendi b. Zünnun ve fahrü’l-a‘yân Abdünnebi Ağa b. Rasûl şehâdetleri ile vekâleti sâbite olan es-Seyyid Mehmed Bedi Efendi b. Refi Efendi mahzarında ikrâr ve takrîr-i kelâm edip Havâss-ı aliyye kazâsı muzâfâtından Çatalca nâhiyesi a‘malinden Şeyh Sinan nâm karyede vâki‘ bir tarafdan ba‘zan Topal Ahmed mülküne ve ba‘zan Atike Hatun mülküne ve ba‘zan Mehmed Beyoğlu mülküne ve üç tarafı tarîk-i âmma müntehî hâriciye üç bâb fevkānî odayı ve bir sofayı ve tahta-pûş ve çeşme mahzenini ve üç anbârı ve bir sundurmayı ve kebîr ahuru ve ona muttasıl harâba müşrif üç bâb odayı ve adedi ma‘lûm çatma odaları ve zât-ı eşcâr-ı müsmire ve gayri müsmire bahçeyi ve dâhiye iki bâb fevkānî odayı ve sofayı ve dehlizi ve memşâ ve âbdesthâneyi ve tahtânî iki bâb odayı ve harâba müşrif bir bâb odayı ve matbahı ve iki fırını ve bir sundurmayı ve bir ahuru ve havuz ve zât-ı eşcâr-ı müsmire ve gayr-ı müsmire bahçeyi müştemil mülk çiftlik menzilleri ile hâriciyeye mukābil iki tarafı devlet alasına? ve iki tarafı tarîk-i âmma müntehî iki öküz ahırını ve samanlıkları ve hıdmetkâr odalarını ve mülk harmanı yerini hâvî havluyu ve ona muttasıl lede’l-ahâlî ma‘lûmü’l-hudûd bir kıt‘a mülk bağı ve karye-i Komarlı’da vâki‘ lede’l-ahâlî ma‘lûmü’l-hudûd mülk mandırayı ve ona tâbi‘ ma‘lûmü’l-hudûd ahırları ve samanlıkları ve fevkānî ve tahtânî odaları ve hıdmetkâr odalarını ve ol çiftliğine tasarruf olunan kalîl ve kesîr lede’l-ahâlî ma‘lûmü’l-hudûd odalar ve havluları tevâbi‘i ile ve Karacakarye de vâki‘ bir göz mülk su değirmenini ve Ormanlı da bir göz mülk su değirmeni ve karye-i merkūme Komarlı da vâki‘ bir göz mülk sultanî değirmeni ve Kavaklı da vâki‘ bir göz mülk harâba müşrif değirmeni ve nev‘ ve adedi müvekkil-i müşârün-ileyh Mehmed Paşa hazretleri ile beynimizde ma‘lûm devâbb ve mevâşîyi müvekkil-i müşârün-ileyh Mehmed Paşa hazretlerine her yüz seksen gün tamamında bir yük akçe verip beş yüz kırk gün tamamına dek edâ etmek şartıyla üç yük akçeye bey‘ onlar dahi ber-minvâl-i muharrer iştirâ ve kabûl ve ol çiftliğe tâbi‘ mezbûr Şeyh Sinan Vakfı’ndan olup tasarrufumuzda olan lede’l-ahâlî ma‘lûmü’l-hudûd tarlaları ve çayırları ve Küçük Ayasofya Vakfı’ndan olup tasarrufumuzda olan lede’l-ahâlî ma‘lûmü’l-hudûd ve’l-kıt‘a tarlalar ve çayırları ve Şehzâde Sultan Mehmed Han Vakfı’ndan ve Fâtih Sultan Mehmed Han Vakfı’ndan ve Sultan Süleyman Han Vakfı’ndan olup tasarrufumuz olan lede’l-ahâlî ma‘lûmü’l-hudûd tarlaları ve çayırları sahib-i arzları izni ile iki yük akçe bedelin bir yük akçesini hâlâ edâ edip bir yük akçesi müddet-i mezbûre beş yüz kırk gün tamamına dek semen-i mezbûr üç yük akçeyi edâ eylediklerinden sonra yüz seksen gün tamamına değin edâ etmek şartıyla iki yük akçe mukābelesinde ferâğ ve tefvîz anlar dahi tefevvüz ve kabûl edip bedel-i mezbûr iki yük akçenin bir yük akçesini âcil kabz edip ol çiftlik tarlalar ve çayırları mahâllinde teslîm ve kabza müvekkil-i müşârün-ileyh hazretlerine taslît min-ba‘d ol çiftlik mülk-i müşterâsı ve ol tarlalar hakk-ı müfevvazı olup mutasarrıf olsunlar dediklerinde gıbbe’t-tasdîkı’l-mu‘teber vâki‘ hâli mevlânâ-yı mezbûr mahâllinde tahrîr ba‘dehû meclis-i şer‘a gelip ala vukū‘ihî ihbâr ve takrîr etmeğin mâ hüve’l-vâki‘ bi’t-taleb ketb olundu. Fi’l-hâmis ve’l-işrîn min-Recebi’l-ferd li-sene isnâ ve seb‘în ve elf. Şuhûdü’l-hâl: Umdetü’l-mevâlî Emin Mehmed Efendi, Fahrü’l-müderrisîn Abdülhâdi Efendi, Fahrü’l-müderrisîn Abdullah Efendi, Kudvetü’l-müderrisîn Nazikîzâde Mustafa Efendi, Fahrü’l-a‘yân Abdullah Ağa b. Rasûl, Mehmed Çelebi b. Hızır Şeyh Sinan sâkini.