İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 267 Hüküm no: 232 Orijinal metin no: [28b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Abdullah’ın boşandığı kocası Ramazan b. Ali’den mihir talebinin reddedildiği Hul‘. Mahmiye-i İstanbul’da Kazganî İlyas mahallesinde sâkine Rahime bt. Abdullah nâm hatun meclis-i şer‘de bâ‘isü’l-vesîka zevc-i mutallıkı Ramazan b. Ali mahzarında üzerine da‘vâ ve takrîr-i kelâm edip mezbûr Ramazan zevcim olup târih-i kitâbdan üç ay mukaddem talâk-ı selâse ile beni tatlîk edip zimmetinde mütekarrir ve ma‘kūdün-aleyh bin yedi yüz akçe mehr-i müeccelimin bin akçesini ve kadr-ı ma‘rûf nafaka-i iddet-i ma‘lûmem ve me’ûnet-i süknâm için dahi üç yüz akçe ki cem‘an bin üç yüz akçe yedinden alıp kabz eylediğimde mihrimden bâkī yedi yüz akçe zimmetinde kalmış idi hâlâ meblağ-ı bâkī mezkûr yedi yüz akçeyi dahi mezbûrdan taleb ederim suâl olunsun dedikde gıbbe’s-suâl mezbûr Ramazan cevâbında fi’l-hakīka kazıyye tafsîli mürûr eden vech üzre olduğunu ikrâr lâkin mehr-i merkūm bin yedi yüz akçe olduğunu inkâr edicek müdde‘iyye-i mezbûreden ziyade beyyine taleb olundukda ityân-ı beyyineden izhâr-ı acz edip istihlâf etmeğin mezbûre Rahime’nin mehr-i mü’ecceli bin yedi yüz akçe olup mehrinden bâkī zimmetinde dört yüz akçe kalmadığına mezbûr Ramazan’a yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mezbûre Rahime mu‘ârazadan men‘ olunup mâ hüve’l-vâki‘ bi’t-taleb ketb olundu. Fi 24 min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: el-Hâc Ahmed b. Mahmud, Mehmed Çelebi b. Hüseyin, Mustafa Çelebi b. ( ), Şükrullah b. Mustafa, Veli b. Mahmud.