İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 270 Hüküm no: 236 Orijinal metin no: [29a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aynî Hatun Vakfı’na İsmail Çelebi’nin mütevelli tayin edildiği Nasb-ı hasbî tevliyet. Mahmiye-i İstanbul’da Hoca Üveys mahallesinde vâki‘ merhûme Aynî Hatun nâm sahibetü’l-hayr vakf ve gallesini mahalle-i mezbûre imâmına şart ve ta‘yîn eylediği bir tarafdan merhûm Allâme Efendi mülkü ve bir tarafdan Huri Hatun Vakfı ve bir tarafdan tarîk-i hâs ve bir tarafdan tarîk-i âm ile mahdûd menzilin hasbî mütevellîsi olan Ahmed Çelebi fevt olup tevliyet-i mezbûre mahlûl olmağın işbu bâ‘isü’l-kitâb İsmail Çelebi b. Ahmed nâm kimesne her vechile mütedeyyin ve perhizkâr ve müstakīm kimesne olduğunu zeyl-i rakîmde mastûrü’l-esâmî olan Müslimîn ihbâr eylediklerinde cânib-i şer‘den mezbûr İsmail Çelebi vakf-ı mezbûra hasbî mütevellî nasb ve ta‘yîn olundukda ol dahi kabûl ve hıdemâtını edâya ta‘ahhüd eylemeğin mâ hüve’l-vâki‘ bi’t-taleb ketb olundu. Fi’l-hâmis ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: el-Hâc Yusuf b. Abdülkadir, Ahmed Çelebi b. Mahmud el-müezzin, Mahmud Çelebi b. Hasan, es-Seyyid Mehmed Çelebi b. es-Seyyid Nasuh, Mustafa Çelebi b. Muharrem, Ali Çelebi b. Hüseyin, Mustafa Çelebi b. Hüseyin, el-Hâc Ahmed b. Mahmud