İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 271 Hüküm no: 238 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Hasan’ın Muslı Reis b. Çalabverdi’den alacak davasının reddedildiği Hüccet yemîni. Gemici tâifesinden Mehmed Beşe b. Hasan meclis-i şer‘de hâfızü’l-vesîka Muslı Reis b. Çalabverdi mahzarında ikrârını da‘vâ ve takrîr-i kelâm edip târih-i kitâbdan on beş gün mukaddem mukaffel küçük sebet sandığım ile içinde olan otuz bin sermâye akçemi hıfz eyle ve illâ bana ver yâhud eve götür deyü mezbûra teslîm ol dahi alıp re’s-i kamarasına vaz eyledikden sonra lâzım olmağın ol sandığı açtığımda ol sandığın altı bıçak ile yarılıp ol akçe içinden ahz olunmakla meblağ-ı mezbûru merkūm Muslı Reis’den taleb ederim suâl olunsun dedikde gıbbe’s-suâl mezbûr Muslı Reis cevâbında fi’l-vâki‘ müdde‘î-i mezbûr Mehmed Beşe kamaranda hıfz eyle deyü ol mukaffel sandığı bana teslîm ben dahi alıp zikrolunan kamaraya vaz‘ eyledim lâkin ol sandığın içinde otuz bin akçe alıp ahz eylemediğimden mâ‘adâ akçesi olduğu ma‘lûmum değildir deyip ol sandığı kabzını ikrâr ve içinde otuz bin akçesi olup minvâl-i muharrer kabzını inkâr eyledikde müdde‘î-i mezbûrdan müdde‘âsını mübeyyin beyyine taleb olundukda ityân-ı beyyineden izhâr-ı acz edip ber-vech-i âtî istihlâf etmeğin ol sandığın altını yarıp meblağ-ı mezbûru içinden ahz eylemediğine mezbûr Muslı Reis’e yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin müdde‘î-i mezbûr bilâ-beyyine mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’r-râbi‘ ve’l-işrîn min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Hüseyin Efendi b. el-Burûsî, Keşfî Mustafa Efendi b. ( ), Abdi Çelebi b. Hüseyin, Şükrullah b. Mustafa, Rasûl b. Rıdvan