İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 271 Hüküm no: 239 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un miras davasından üzerine düşen hissenin parasını Fâtıma bt. Receb’den tahsil ettiği Sulh ve ibrâ. Sâbıkā Doksan iki cemâ‘atinin odabaşısı olup mahmiye-i İstanbul’da Karaköykapısı kurbünde vefât eden Ahmed Çelebi b. Mehmed’in verâseti zevce-i metrûkesi Fâtıma bt. Receb’e ve sagīre kızı Âişe’ye ve li-ebeveyn kız karındaşı Âişe Hatun’a münhasıra olduğu ve tashîh-i meselesi sekiz sehimden olup sihâm-ı mezbûrenin bir sehmi zevcesine ve dört sehmi kız karındaşı mezbûre Âişe’ye isâbet eylediği şer‘an zâhir oldukdan sonra mezbûre Âişe tarafından husûs-ı câ’i’z-zikre vekîl olup mezbûrenin zâtını ma‘rifet-i şer‘iye ile ârifân Mehmed Odabaşı b. Eyüb ve el-Hâc Kenan Paşa b. Abdullah şehâdetleriyle şer‘an vekâleti sâbite olan birinci ağa bölüğüne mahsûs oda ahâlîsinden Ahmed Beşe b. Süleyman meclis-i şer‘de müteveffâ-yı mezbûrun metrûkâtına vâzı‘atü’l-yed idiği şer‘an zâhir olan mezbûre Fâtıma’nın hâlâ zevci ve tarafından ikrâr-ı âti’z-zikri tasdîka vekîl-i şer‘îsi olan Mustafa Odabaşı b. Hüseyin mahzarında bi’l-vekâle ikrâr ve takrîr-i kelâm edip müteveffâ-yı mezbûrun cümle terekesinden müvekkilem mezbûre Âişe’ye intikāl eden üç sehm hissesinden şerâ’it-i hüccet-i sulhü hâvî tehârüc-i şer‘î tarîki üzere mezbûre Fâtıma Hatun müvekkilem mezbûre Âişe ile on yedi bin akçe üzerine inşâ-i akd-i sulh eyledikde müvekkilem dahi sulh-i mezbûru kabûl ve bedel-i sulh olan meblağ-ı mezbûru tamamen alıp kabz edip mâ‘adâdan mezbûre Fâtıma’nın zimmetini ibrâ-i âm ile ibrâ ve ıskāt eyledi dedikde kasr-ı mezbûru cârî ve sâdır olan cemî‘ kelimâtında vekîl-i mezbûr bi’l-muvâcehe tasdîk ve bi’l-müşâhede tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: İskender b. Hacı, Davud b. Kasım, Süleyman b. İsa, Ömer b. Süleyman, Ahmed b. Süleyman, Sinan b. İsa, Hasan b. Mustafa, Ahmed b. Mahmud