İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 275 Hüküm no: 245 Orijinal metin no: [30a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Habib menzilini Yusuf Odabaşı b. Abdullah’a sattığı Mülknâme. Mahmiye-i İstanbul’da Kādıasker Mehmed Efendi mahallesi sükkânından Ali Beşe b. Habib nâm râcil meclis-i şer‘de işbu râfi‘u’l-kitâb Yusuf Odabaşı b. Abdullah mahzarında ikrâr ve takrîr-i kelâm edip akd-i âtî sudûruna değin silk-i mülkümde münselik hakkım olup mahalle-i mezbûrede vâki‘ bir tarafdan ba‘zan Usta Hasan Vakfı’na ve ba‘zan Saime Hatun mülküne ve bir tarafdan tarîk-i hâssa ve bir tarafdan ba‘zan Hadîce Hatun mülkü ve ba‘zan sulehâya meşrût olan vakf menzile ve bir tarafdan tarîk-i âmma müntehî ve mahdûd olup bir bâb tahtânî oda ve bir sofa ve bir su kuyusu ve kenîfi ve havluyu müştemil cemî‘ menzilimi kâffe-i hukūk ve merâfıkı ile on iki bin râyic fi’l-vakt akçeye mezbûr Yusuf Odabaşı’ya bâtten bey‘ u teslîm ol dahi minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûru tamamen mezbûr Yusuf Odabaşı yedinden alıp kabz eyledim ba‘de’l-yevm menzil-i mahdûd-ı mezbûr merkūm Yusuf Odabaşı’nın mülk-i müşterâsıdır keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 24 min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Ahmed Efendi b. Mehmed el-müezzin, el-Hâc İbrahim b. Mehmed, Süleyman Efendi, Hacı Abdullah b. Mehmed, Mehmed b. Halil, İbrahim b. Cafer.