İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 276 Hüküm no: 246 Orijinal metin no: [30a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Markor v. Kirkor ile Harin v. Horoz’un alacak verecek davasından birbirlerini ibra ettikleri Tarafeyn ibrâ. Mahmiye-i İstanbul’da Koca Mustafapaşa kurbünde habbâz olan Markor v. Kirakor nâm Ermeni meclis-i şer‘de işbu bâ‘isü’s-sifr Harin v. Horoz nâm Ermeni muvâcehesinde bi’t-tav‘i’s-sâf ikrâr ve takrîr-i kelâm edip mezbûr Harin zimmetinde ekmek semeninden on üç bin sekiz yüz akçe hakkım olup meblağ-ı mezbûru merkūm-ı mezbûr Harin’den akdem da‘vâ ve taleb eylediğimde ol dahi ben sana târih-i kitâbdan altı ay mukaddem Sultan Mehmed Han Medresesi’nde on üç bin beş yüz akçe def‘ u teslîm eylediğimden mâ‘adâ beher yevm altışar akçe ücret ile beni îcâr eylemiş idi. Zimmetinde elli günde müctemi‘ olan iki bin beş yüz akçe dahi gündeliğimden kalmış idi demekle, beynimizde münâza‘ât-ı kesîre ve muhâsamât-ı şedîde vâki‘ olmuş idi. El-hâletü-hâzihî tavassut-ı muslihîn ile da‘vâ-yı mezbûremden mezbûre Harin benimle iki bin beş yüz akçe inşâ-i akd-i sulh eyledikde ben dahi sulh-i mezbûru kabul ve bedel-i sulh olan meblağ-ı mezbûru merkūm Harin yedinden tamamen alıp kabz edip müeddâsı olan on bir bin üç yüz akçe da‘vâsından târih-i kitâba gelince beynimizde vâki‘ olan ahz u i‘tâ ve mu‘âmelât-ı şettâya müte‘allika cemî‘ de‘âvîden ben onun zimmetini ol dahi benim zimmetimi ibrâ-i âmm-ı kātı‘u‘n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’s-sâbi‘ min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: el-Hâc Ahmed b. Mehmed, Abdi Çelebi b. Hüseyin, Şükrullah b. Mustafa, Rasûl b. Rıdvan, Mehmed b. Ramazan.