İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 277 Hüküm no: 248 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhtesib İskenden mahallesinden Gevher Hatun ile Mustafa Beşe b. İsmail’in hisselerini Ahmed Beşe b. Mehmed’e sattıkları Mübâya‘a. Mahmiye-i İstanbul’da Muhtesib İskender mahallesinde sâkin iken bundan akdem vefât eden Hasan Beşe b. İsmail’in verâseti sulbiye kebîre kızı Gevhen Hatun’a ve li-ebeveyn ammi oğulları Mustafa Beşe b. Ramazan ve Ahmed Beşe b. Mehmed’e münhasıra ve tashîh-i meseleleri dört sehimden olup sihâm-ı mezbûreden her birine isâbet ve intikāl eylediği şer‘an zâhir ve müte‘ayyin oldukdan sonra mezbûr Mustafa Beşe asâleten ve mezbûre Gevher’in zevci tarafından husûs-ı âti’l-beyânı ikrâra vekîl olup mezbûrenin zâtını ma‘rifet-i şer‘iye ile ârifân Nasuh Efendi b. Abdullah ve Yusuf b. Ali şehâdetleriyle şer‘an vekâleti sâbite olan Mehmed Çelebi b. Ali vekâleten meclis-i şer‘de bâ‘is-i hâze’l-kitâb mezbûr Ahmed Beşe mahzarında her biri ikrâr ve takrîr-i kelâm edip müteveffâ-yı mezbûrun muhallefâtından olup mahmiye-i merkūmede vâki‘ bir tarafdan Medîne-i Münevvere Vakfı ve bir tarafı Ahmed Beşe değirmeni ve bir tarafı Karagümrük meydânı ve bir tarafı tarîk-i âm ile mahdûd tabaka-i ulyâda üç bâb fevkānî oda ve tabaka-i vüstâda iki bâb oda ve tabaka-i süflâda bir kilâr ve kenîfi müştemil menzil müteveffâ-yı mezbûrun ile’l-vefât mülkü olup ba‘de vefâtihî ırsen verese-i mezbûrûna intikāl etmekle hâlâ menzil-i mahdûd-ı mezbûru beynimizde müzâyede eylediğimizde merkūm Ahmed Beşe üzerinde altmış bin akçede karâr edip ziyâde bir tâlib-i âhar dahi bulunmamağın bizim rızâmız ile altmış bin akçe mezbûr Ahmed Beşe’ye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ u teslîm ol dahi vech-i mübîn üzre iştirâ ve tesellüm eyledikden sonra semeni olan meblağ-ı mezbûr altmış bin akçeden mezbûr Ahmed Beşe’nin hissesine isâbet eden on beş bin akçeden mâ‘adâ müvekkile-i merkūme Gevher’in iki sehm hissesine isâbet eden otuz bin akçeyi mezbûr Mustafa Beşe’nin bir sehm hissesine isâbet eden on beş bin akçeyi müşteri-i mezbûr Ahmed Beşe yedinden tamamen ahz u kabz eyledik ba‘de’l-yevm menzil-i mahdûd-ı mezkûr merkūm Ahmed Beşe’nin mülk-i müşterâsıdır keyfe mâ yeşâ ve yehtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Şa‘bâni’l-mu‘azzam li-sene isneteyn ve seb‘în ve elf. Şuhûdü’l-hâl: Nasuh Efendi b. Abdullah, Hasan Çelebi b. Mustafa, Süleyman Çelebi b. Mehmed, Ali Çelebi b. Ahmed, Yusuf b. Ali.