İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 282 Hüküm no: 254 Orijinal metin no: [31a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un eşinden intika eden hissesine Ahmed b. Abdullah’ın vekil tayin edildiği Vekâlet. Mahmiye-i İstanbul’da Hoca Üveys mahallesi ahâlîsinden olup vefât eden Mehmed Çavuş’un verâseti sulbî kebîr oğlu Ahmed Ağa ile sulbiye kebîre kızı Fâtıma Hatun’a münhasıra olduğu şer‘an zâhir oldukdan sonra mezbûre Fâtıma Hatun tarafından ikrâr-ı âti’z-zikre vekîl olup mezbûreyi ma‘rifet-i şer‘iye ile ârifân zevci Yusuf Bey b. Abdullah ile İslam Bey b. Mustafa nâm kimesneler şehâdetleriyle şer‘an vekâleti sâbite olan el-Hâc Ahmed b. Abdullah nâm kimesne meclis-i şer‘de bi’l-vekâle ikrâr ve takrîr-i kelâm edip müvekkile-i mezbûre Fâtıma Hatun’a babası müteveffâ-yı mezbûr Ahmed Çavuş’un muhallefâtınan li’z-zekeri misle hazzi’l-ünseyeyn bir sehm hissesine ta‘yîn olunup zimem-i nâsda olan akçeleri ahz u kabz ve iktizâ ederse sulha ba‘dehû kendüye teslîme ve bunların mütevakkıf olduğu umûr-ı lâzımesine hâfızü’l-kitâb Ahmed Ağa b. Halil tarafından vekîl nasb eyledi dedikde, ol dahi vekâlet-i merkūmeyi kabûl ve hıdmetini edâya ta‘ahhüd etmeğin mâ-vaka‘a bi’t-taleb ketb olundu. Fi’s-sâdis ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Hüseyin Efendi el-Burûsî, Mustafa Efendi el-kādî, Keşfî Mustafa Efendi el-kâtib, Abdi Çelebi b. Hüseyin, Şükrullah b. Mustafa, Rasûl b. Rıdvan