İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 284 Hüküm no: 258 Orijinal metin no: [31b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arslan v. Karz isimli Ermeni’nin menzilcilik yaptığı hizmetiyle ilgili eline emr-i şerîf verilmesi talebi Mahmiye-i İstanbul’da bi’l-fi‘il menzilci olan işbu hâmilü’s-sifr Arslan v. Karz nâm Ermeni zimmî meclis-i şer‘-i hatîrde takrîr-i kelâm edip bundan akdem mahmiye-i mezbûrede menzilcilik hidmeti yirmi re’s bargir beslemek şartıyla senede İstanbul gümrüğünden iki yük elli bin akçe verilip üç sene ber-tahvîl olmak üzere bana der-uhde olunup nice eşyâ hazır edip mühimmâtın görmüş iken ba‘zı kimesneler üzerimden almak murâd eylemeleri ile kemâ-kân bana mukarrer olmak bâbında bundan esbak ahvâlimi der-i ma‘delet-masîre i‘lâm eylediğimde hazîne-i âmirede mahfûz mevkūfât defterlerine İstanbul gümrüğünden senede iki yük elli bin akçe verilip yirmi bargir beslemek şartıyla üç seneye dek menzilcilik benim üzerimde mukayyed ve mastûr olduğunu müş‘ir yedime emr-i şerîf verilmişdir nazar olunup mûcebince hüccet tahrîr olunmak matlûbumdur deyü takrîr-i meşrûhuna mutâbık ve târih-i kitâb-ı Şa‘bâni’l-mu‘azzam’ın yirmi yedinci günü târihiyle müverrah emr-i şerîf-i cihân-mutâ‘ ibrâz edip ba‘de’n-nazar ve’l-kırâe mûcebince işbu hurûf li-ecli’t-temessük bi’t-taleb ketb olundu. Fi’l-yevmi’s-sâbi‘ ve’l-işrîn min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: el-Hâc Ahmed b. Mahmud, Ali b. Muharrem, Mustafa b. Mehmed, Hüseyin b. Ebûbekir, Mehmed b. Ramazan.