İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 284 Hüküm no: 259 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasen Beşe b. İsmail’in Rus asıllı kölesi Ferah b. İsmail’i azat ettiği Itk-nâme. Mahmiye-i İstanbul’da Muhtesib İskender mahallesinde sâkine işbu râfi‘atü’l-vesîka orta boylu açık kaşlı gök elâ gözlü Rusiyyetü’l-asl Ferah bt. Abdullah mahfil-i kazâda mahalle-i mezkûrede sâkin iken bundan akdem vefât eden Hasan Beşe b. İsmail’in sulbiye kebîre kızı Gevher Hatun’un tarafından husûs-ı âti’l-beyâna vekîl olup mezbûreyi ma‘rifet-i şer‘iye ile ârifân olan mahalle-i merkūmeden Nasuh Efendi b. Abdullah ve Yusuf Çelebi b. Ali şehâdetleri ile şer‘an vekâleti sâbite olan zevci Mehmed Çelebi b. Ali ve li-ebeveyn ammi oğulları Mustafa Beşe b. Ramazan ve Ahmed Beşe b. Mehmed mahzarlarında üzerlerine da‘vâ ve takrîr-i kelâm edip yine müteveffâ-yı mezbûr Hasan Beşe’nin câriye-i memlûkesi iken hâl-i sıhhatinde beni tedbîr-i mutlak ile müdebbere ve ba‘de’l-vefât sülüs dahi müsâ‘id olup ben sâyir harâyir-i asliyât gibi hürre olmuş iken mezbûrûn müteveffâ-yı mezbûrun muhallefâtındandır deyü bi-gayr-ı vech-i şer‘î bana vaz‘-ı yed ederler suâl olunsun kasr-ı yedlerine tenbîh olunmak matlûbumdur dedikde gıbbe’s-suâl mezbûrûn cevâblarına müdde‘iyye-i merkūmenin vech-i mübeyyen üzre müdebbere olup ve sülüs dahi müsâ‘id olduğunu inkâr eylediklerinde müdde‘iyye-i merkūmeden müdde‘âsını mübeyyin beyyine taleb olundukda udûl-i Müslimînden olup mahalle-i merkūmeden Hasan Çelebi b. Mustafa ve Süleyman Çelebi b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Hasan Beşe hâl-i hayatında işbu câriye-i memlûkesi olan merkūme Ferah’ı bizim huzûrumuzda tedbîr-i mutlak ile müdebbere eyledi ve sülüs dahi müsâ‘iddir biz bu husûsa bu vech üzre şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mezbûrenin ıtkına hüküm-birle mâ-vaka‘a bi’t-taleb ketb olundu. Fi’l-hâmis ve’l-işrîn min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: Nasuh Efendi b. Abdullah, Hasan Çelebi b. Mustafa, Yusuf Çelebi b. Ali, Ahmed Beşe b. Ali, Ali Çelebi b. Ahmed, Abdi Çelebi b. Hüseyin, Şükrullah b. Mustafa, Rasûl b. Rıdvan