İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 319 Hüküm no: 302 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram Beşe b. Hüseyin menzilini Ali b. Yusuf’a sattığı Mahmiye-i İstanbul’da Akşemseddin mahallesi sâkinlerinden Bayram Beşe b. Hüseyin nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ali b. Yusuf nâm kimesne mahzarında ikrâr ve takrîr-i kelâm edip silk-i mülkümde münselik mahalle-i mezbûrede vâki‘ bir tarafdan Solak Vakfı olan menzil ve bir tarafdan Zipon Mehmed mülkü olan menzil ve bir tarafdan Hasan Çelebi Vakfı olan menzil ve bir tarafdan tarîk-i âm ile mahdûd bir bâb fevkānî ve bir bâb tahtânî menzilleri ve sofayı ve kenîfi ve bir mikdâr cüneyneyi müştemil olan mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr Ali’ye yirmi bin nakd-i râyic fi’l-vakt fıddî akçeye bey‘-ı bâtt-ı sahîh-i şer‘î ile bey‘ u teslîm ol dahi minvâl-i muharrer üzere iştirâ ve tesellüm eylediğinden sonra semeni olan meblağ-ı mezbûr yirmi bin akçeyi mezbûr Ali yedinden bi’t-tamam ve’l-kemâl ahz u kabz eyledim ba‘de’l-yevm zikrolunan menzil mezbûr Ali’nin mülk-i müşterâsıdır keyfe mâ yeşâ ve yahtâr mutasarrıf olsun dedikde mukırr-ı merkūm Bayram Beşe’nin minvâl-i muharrer üzere cârî ve sâdır olan ikrâr-ı meşrûhunu mezbûr Ali bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min-Ramazani’l-mübârek li-sene isneyn ve seb‘în ve elf. Şuhûdü’l-hâl: Ahmed Efendi b. Mahmud el-kādî, Ali Efendi b. Abdülcelil, Hüseyin Çelebi b. Hasan. İsmail Çelebi b. Abdullah, Mehmed Çelebi b. es-Seyyid Ali, Mehmed b. Bektaş, Hüseyin Çelebi b. Yusuf.