İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 320 Hüküm no: 303 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacağın tahsili için vekil tayin edildiği Sâbıkā Şam Beylerbeyisi olan hâlâ emirü’l-hâc olan düstûr-ı mükerrem Süleyman Paşa hazretleri tarafından husûs-ı âtîye vekîl-i müsecceli olup sâbıkā dergâh yeniçerileri ocağında mehterbaşı olan Ali Ağa b. Mehmed meclis-i şer‘de hâlâ kapıcılar kethudâsı olan umdetü’l-emâcid ve’l-ekârim Mehmed Ağa tarafından husûs-ı âtîye vekîl diğer Ali Ağa b. Mehmed ve Mustafa Çelebi b. Mehmed şehâdetleri ile şer‘an vekâleti sâbite olan Hüseyin Ağa b. Mustafa mahzarında bi’l-vekâle ikrâr ve i‘tirâf edip müşârün-ileyh Süleyman Paşa hazretleri mâlı olmak üzere ammisi Mehmed Ağa ile benim yedimden mûmâ-ileyh Mehmed Ağa iktizâ hasebiyle on yedi bin beş yüz esedî guruş istikrâz ve kabz edip ve mezbûr Mehmed Ağa’nın dahi Şâm-ı şerîfde bin yetmiş bir senesine mahsûb olmak üzere taraf-ı mîrîden iltizâm eylediği hâne-i avârız cem‘ine tarafından hâlâ …? vekîli olan el-Hâc Mustafa Ağa’nın makbûzu olup yedinde olan mâlından meblağ-ı mezbûr on yedi bin beş yüz esedî guruş deyni mukābelesinde ahz u kabz ve istifâya tarafından müşârün-ileyh Süleyman Paşa hazretlerini kabûlüne mevkūfe vekâlet ile vekîl nasb ve ta‘yîn etmişdir suâl olunup bi’l-vekâle ikrârı tahrîr ve yedime def‘ olunması matlûbumdur dedikde gıbbe’s-suâl vekîl-i mezbûr Hüseyin Ağa cevâbında kazıyye bâlâda tafsîli mürûr ettiği vech üzere olduğunu bi’l-vekâle ikrâr ve i‘tirâf etmeğin ol ki vâki‘u’l-hâldir bi’t-taleb ketb olundu. Fi’s-sâbi‘ ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Çerkes Abdullah, Halil Beşe b. Abdullah, Mustafa Çelebi b. Mehmed, Ali Beşe b. Mehmed, Mustafa Beşe b. Ebûbekir, Küçük Hüseyin b. ( ), Ali Beşe b. Abdullah, Mehmed b. Abdullah.