İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 321 Hüküm no: 304 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım’ın hissesinin Süleyman Ağa b. Mehmed’e satıldığı Mübâya‘a. Mahmiye-i İstanbul’da Tercüman Yunus mahallesinden Ali Ağa b. Emrullah meclis-i şer‘-i hatîrde hâlâ Mısr-ı Kāhire’de şehir havâlesi olan umdetü’l-a‘yân Şaban Ağa tarafından husûs-ı âti’z-zikre vekîl ve âharı tevkîle me’zûn olan İsmail Ağa tarafından husûs-ı âti’z-zikre vekîl olup Mehmed Efendi b. Abdülkerim ve Mustafa Bey b. Ali’nin şehâdetleri ile şer‘an vekâleti sâbite olan Süleyman Ağa b. Mehmed mahzarında ikrâr ve i‘tirâf edip mahmiye-i mezbûrede Ördek Kasap mahallesinde vâki‘ bir tarafdan ba‘zan Salih Efendi ve ba‘zan Mustafa Bey mülküne ve bir tarafı ba‘zan Şerhi Efendi ve ba‘zan Mustafa Efendi mülküne ve ba‘zan mahalle-i mezbûrda ikāmete mevkūfe menzile ve ba‘zan Kurd Ağa Hatunu Vakfı’na ve ba‘zan mü’ezzin ( ) mülküne ve iki tarafı tarîk-i âmma müntehî buyût-ı adîdeyi hâvî mecmû‘ menzilin nısf-ı mu‘ayyen-i müfrezi benim ve nısf-ı mu‘ayyen-i müfrezi-i âharı karındaşı Hızır Ağa’nın mülkü olmağın mukaddemâ benim nısf müfrez hissemi mûmâ-ileyh Şaban Ağa’ya iki yük kırk bin akçeye bey‘ u teslîm ve kabz-ı semen etmiş idim ve karındaşım dahi nısf müfrez hissesini bi-tarîkı’l-istiğlâl Rıdvan Ağa b. Abdullah’a dokuz yük otuz yedi bin akçeye deyni mukābelesinde bey‘ ol dahi minvâl-i muharrer üzere iştirâ ve kabûl edip meblağ-ı mezbûr zimmetinde iken karındaşım vefât edip verâseti bana münhasıra oldukdan sonra dâyin-i mezbûr Rıdvan Ağa dahi vefât edip verâseti zevce-i metrûkesi Âişe Hanım b. Ali Paşa’ya ve sulbî sagīr oğlu Nuh Bey’e münhasıra olup ba‘dehû mezbûre Âişe Hanım vefât edip verâseti sadrî sagīr oğlu mezbûr Nuh Bey’e münhasıra olup ba‘dehû mezbûr Nuh Bey dahi vefât edip verâseti vâlidesinin li-ebeveyn kız karındaşı Hadîce Hanım’a münhasıra olup ve karındaşım müteveffâ-yı mezbûr Hızır Ağa’nın rehni olan nısf müfrez menzilden gayrı edâ-i deyn olunacak terekesi olmamağın ol nısf müfrez-i mezbûru ba‘de’l-fek ve’l-müzâyedeti’l-mu‘ayyen merkūme Hadîce Hanım muvâcehesinde izni ile vekîl-i mezbûr Süleyman Ağa’ya iki yük kırk bin akçeye bey‘ u teslîm ol dahi müvekkil-i mûmâ-ileyh Şaban Ağa için def‘ u teslîm-i müşteri olan vekîl-i mezbûra emir edip ol dahi emrim üzere semen-i mezkûru merkūme Hadîce Hanım’a teslîm ol dahi tamamen semen-i mezbûru kabz ve teslîm etmeğin min-ba‘d menzil-i mezbûrda benim alâka ve medhalim kalmayıp müvekkil-i mûmâ-ileyhin mülk-i müşterâsı olmuşdur mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sânî ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Mefharu’l-eimme Hasan Efendi, İbrahim Efendi b. Süleyman, Ahmed Çavuş b. ( ), Receb Çelebi b. ( ), Mustafa b. ( ).