İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 324 Hüküm no: 309 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi b. Hasan’ın zevcesi Fâtıma bt. Mustafa ile babası tarafından parasının çalındığı iddiasının reddedildiği Yemîn. Medîne-i Ebû Eyüb Ensârî mahallâtından Arakiyeci mahallesinde sâkin Ömer Çelebi b. Hasan nâm kimesne mahfil-i kazâda işbu sahibü’l-kitâb mezbûr Ömer Çelebi’nin sâbık zevcesi olan Fâtıma bt. el-Hâc Mustafa ve babası merkūm el-Hâc Mustafa ve karındaşı Hüseyin ve Gülbûy bt. Abdullah mahzarlarında üzerlerine da‘vâ ve takrîr-i kelâm edip târih-i kitâbdan sekiz ay mukaddem mezbûre Fâtıma ile zevciyet beynimizde kāime iken sâkin olduğumuz menzil dâhilinde döşek içinde kîse ile yirmi iki bin akçemi merkūmûn hufyeten ahz u kabz etmişlerdir mezbûrûndan meblağ-ı mezbûru taleb ederim suâl olunsun dedikde gıbbe’s-suâl ve akībe’l-inkâr mezbûr Ömer Çelebi’den da‘vâsına mutâbık beyyine taleb olundukda ityân-ı beyyineden izhâr-ı acz ve istihlâf etmeğin fi’l-vâki‘ târih-i mezbûrda menzil-i mezbûr dâhilinde zikrolunan döşek içinden müdde‘î-i mezbûrun kîse ile yirmi iki bin akçesini hufyeten ahz etmediklerine mezbûrûna yemîn teklîf olundukda onlar dahi alâ-vefki’l-mesûl yemîn billâhi te‘âlâ eylediklerinde mûcebince mezbûr Ömer Çelebi bî-vech mu‘ârazadan men‘ olunup mâ-vaka‘a bi’t-taleb ketb olundu. Fî-selh min-Ramazani’l-mübârek li-sene isnâ ve seb‘în ve elf. Şuhûdü’l-hâl: Mustafa Efendi b. Abdullah İmâm, Abdurrahim Çelebi b. Mustafa Efendi, Keşfî Mustafa Efendi, Abdi Çelebi b. Hüseyin, Mustafa b. İsa.