İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 323 Hüküm no: 308 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Ağa Vakfı mütevellisi İbrahim Çelebi b. Ali’nin zimmetinin ibra edildiği Mahmiye-i İstanbul’da kazzâz tâifesinden olup Kazzâzbaşı Yusuf Ağa Vakfı’na hâlâ mütevellî fahrü’l-a‘yân İbrahim Çelebi b. Ali meclis-i şer‘de tâife-i mezbûreden zahru’l-eşbâh Ahmed Çelebi b. Mehmed mahzarında ikrâr ve i‘tirâf edip bundan akdem sefere tevcîh eylediğimde mezbûr Ahmed Çelebi’yi kāimmakām nasb ve ta‘yîn ve cümle asl-ı mal-ı vakf olan bin üç yüz kırk iki buçuk riyâlî guruşu def‘ u teslîm edip ba‘de geldiğimde mal-ı vakf-ı mezbûr bin üç yüz kırk iki buçuk riyâlî guruşu mezkûr Ahmed Çelebi tamamen bana def‘ u teslîm ben dahi ahz u kabz edip min-ba‘d mal-ı vakf-ı mezbûrdan üzerinde bir akçe ve bir habbe bâkī kalmadığından gayri mukaddemâ mezkûr Ahmed Çelebi ile kazzâzlık san‘atında şerîkler olup hâlâ fesh-i akd-i şirket ve muvakkı‘-ı sadr-ı kitâb huzûrunda ba‘de’l-muhâsama muhâsebe eylediğimizde mal-ı şirketden mezkûr Ahmed Çelebi zimmetinde elli beş bin fıddî râyic fi’l-vakt akçe hakkım zuhûr edip hâlâ edâya iktidârı olmadığı ecilden isticâl etmeğin ben dahi meblağ-ı mezbûru târih-i kitâbdan yüz seksen gün tamamına değin tecîl eylediğimden mâ‘adâ mezkûr Ahmed Çelebi kendi bey‘ edip defter nâtık olduğu zimemle olan altmış beş bin akçe mezbûr Ahmed Çelebi’nin kendi mâlıdır vechen mine’l-vücûh benim için hak ve alâka olmadığından gayri mukaddemâ mezbûr Ahmed Çelebi’ye irsâl edip makbûzu olan dokuz yüz kırk iki esedî guruşun emrimle otuz dokuz bin akçesini ıyâlimin nafaka ve sâir düyûn-ı müteferrikama sarf ve yüz on dokuz buçuk guruşu dâyinim Muharrem Çelebi’ye deynim için ve yirmi iki bin akçeyi altmış dokuz ve yetmiş senelerinde zimem-i nâsda olan mal-ı vakfın murâbahâtını cem‘ u tahsîl edememekle vezâif-i mürtezika-i vakfa verip mâ‘adâ da‘vâsından ve meblağ-ı müeccel-i mezbûr elli beş bin akçeden gayri şirket-i mezbûre ve re’s-i mâl ve beynimizde cereyân eden ahz u i‘tâ ve karz ve diyet ve ücret ve mesârif ve sâir mu‘âmelât-ı hukūk-ı ma‘lûme ve mechûleye müte‘allika cemî‘ de‘âvî ve mutâlebât ve eymân ve muhâsemâtdan mezbûr Ahmed Çelebi’yi ibrâ-i âm ile ibrâ ve ıskāt edip min-ba‘d meblağ-ı müeccel-i mezbûr elli beş bin akçeden gayri mezkûr Ahmed Çelebi zimmetinde vechen mine’l-vücûh ve sebeben mine’l-esbâb benim için bir akçe ve bir habbe hak ve alâka kalmadı dedikde mezbûr Ahmed Çelebi ben dahi şirket beynimizde kāime iken bi-fazlillâhi te‘âlâ hâsıl olan kāimende mezbûr İbrahim Çelebi’nin hissesine düşen makbûzum olan dokuz yüz kırk iki esedî guruşu vech-i meşrûh üzere otuz dokuz bin akçeyi mezbûr İbrahim Çelebi’nin ıyâlinin nafaka ve sâir yüz kāimeden yirmi bin akçeyi mezbûrun deyni için dâyini olan Arpa Emini Süleyman Efendi’ye verdiğimden gayri bana red ve irsâl edip mutasarrıfasına sarf ve yüz on dokuz buçuk guruş deyni için mezbûr Muharrem Çelebi’ye ve altmış dokuz yetmiş senelerinde zimem-i nâsda olan mal-ı vakfın murâbahâtını tahsîl edememekle yirmi iki bin akçeyi mürtezika-i vakfın vezâifine verip ol vechile husûs-ı mezbûra ve cemî‘ şirkete ve re’s-i mâla ve beynimizde cereyân eden ahz u i‘tâ ve karz ve diyet ve ücret ve mesârif ve sâir mu‘âmelât ve hukūk-ı ma‘lûme ve mechûleye müte‘allika olan cemî‘ de‘âvî ve mutâlebâtdan işbu İbrahim Çelebi’yi ibrâ ve ıskāt edip ba‘de’l-yevm mezbûr İbrahim Çelebi kıbelinden benim için vechen mine’l-vücûh ve sebeben mine’l-esbâb bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî gurre-i şehr-i Ramazani’l-mübârek li-sene isnâ ve seb‘în ve elf. Şuhûdü’l-hâl: Mustafa Efendi b. Mehmed, Salih Çelebi b. Mehmed, Ahmed Çelebi b. Osman, Ebûbekir Çelebi b. ( ), Süleyman Bey b. ( ), Rasûl Hoca b. ( ), Mehmed Efendi b. Mahmud.