İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 325 Hüküm no: 311 Orijinal metin no: [39a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Osman’ın İznikmid’de Receb Beşe b. Abdullah’ın kiremidi yanına yıkılan kiremidlerinin Ali Beşe’ye iadesi Teslîme tenbîh. Medîne-i Galata’ya tâbi‘ kasaba-i Kasımpaşa’da sâkin hâfızü’l-vesîka Ali Beşe b. Osman nâm râcil meclis-i şer‘de Receb Beşe b. Abdullah nâm bostânî mahzarında üzerine da‘vâ edip bundan akdem kasaba-i İznikmid’de Kiremidci nâm zimmînin her bin kiremidi iki yüz kırk akçeden on iki bin akçeye iştirâ eylediğim elli bin kiremidi merkūm zimmîye mezbûr Receb Beşe’nin kiremidi yanına yıkıp merkūma teslîm eyle deyü emretmekle ol dahi emrim üzere merkūm Receb Beşe’nin kiremidi yanına yıkıp merkūma teslîm ol dahi ber-minvâl-i muharrer kabz etmiş idi el-hâletü hâzihî mezbûr Receb Beşe’den taleb ederim suâl olunsun dedikde gıbbe’s-suâl mezbûr Receb Beşe dahi cevâbında fi’l-hakīka kazıyye minvâl-i muharrer üzeredir lâkin ol kiremidi kasaba-i merkūmede mandıra ustası olan Ahmed Usta elimden aldı deyip kabzını ikrâr eyledikde ikrârı mûcebince ol kiremidlerin aynîler mevcûd ise aynîleri değil ise misillerini yâhûd kıymet-i şer‘iyelerini müdde‘î-i mezbûr Ali Beşe’ye teslîme mezbûr Receb Beşe’ye tenbîh birle mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Ramazani’l-mübârek li-sene isnâ ve seb‘în ve elf. Şuhûdü’l-hâl: Kâtibü’l-hurûf Hüseyin Efendi el-Burûsî, Mustafa Çelebi b. Mehmed el-muhzır, Mustafa Efendi el-kâtib, Abdülkadir Efendi el-kâtib, Erzurumî Mehmed Efendi el-kâtib, Baba Rasûl b. Rıdvan.